最近修改日期： 2007/2/8      最近閱讀日期：2010/8/31      Iûⁿ Ún-giân 楊允言
羅馬字部分iah未完成，若beh鬥saⁿ-kāng請聯絡管理者

Kò͘-sū chi it 故事之1
	經由1個下鄉ê 機會，tī 這個盛產果子ê 小鎮，做有關農業問題ê 採訪。
	其中1個受訪者，70外歲，日本時代以志願兵ê 名義hō͘ 日本á 調去印尼，面對1部活ê 歷史，心肝頭不免來tín 動--1-下，雖然嘴--nih 問--ê 是「請問你ê 地有jōa 大？」「你是tī 時開始種--ê？」「這幾年ê 情形án-chóaⁿ 樣？」......，心內teh 想--ê，soah 是──南洋戰爭、二二八......。
	「我另外有1個問題想beh 請教--你，就是，二二八事件hit-chūn，請問你tī toh 位á？」
	「Ô͘！Hit 時chūn 我iáu-koh tī 印尼。」
	聽著這句話，lio̍h-á 感覺失望。想起舊年hioh 熱我去二水，chái 起5點外出去sì-kè se̍h-se̍h--leh，tn̄g 著1個70外歲ê 陳老先生，kap i 相借問了後，i soah 對我講起i hông 調去菲律賓ê 往事，而且講chiâⁿ 久。南洋戰爭，我bat tī 小說內底看--過，m̄-koh，這遍有1種真實在ê 感覺tī 心肝頭。
	無tiuⁿ-tî 坐tī 邊--á ê 女主人開始講起二二八往事。I ê 口氣，宛然親像這件tāi-chì chiah 發生tī 幾工á chìn 前。
	「當其時tī 基隆港，hó͘！你就m̄ 知，jōa-nī-á 鬧熱--o͘！學生gín-á kui 大堆，ta̍k-ê lóng kā 國旗giâ gah kôan-kôan，路ê 2-pêng khiā chiok chē 百姓，歡歡喜喜beh 來迎接中國兵á。
	但是等in 落船了後，ta̍k個人soah lóng gāng--去，穿也m̄-chiâⁿ 穿--lah，衫á 褲破gah ká-ná 乞食--leh，穿草鞋á，kha 縛gah phòng-phòng-phòng，後壁koh phāiⁿ 1支雨傘......aih-ioh，笑死人--o͘！M̄-bat 看過hit-lō 型--ê。
	M̄-koh 台灣人iáu 是對in chiâⁿ 好。有ê 外省兵á，食路邊擔á 無beh 付siàu，而且koh pháiⁿ 聲pháiⁿ 款，lán mā 是原諒--in，mā 是hō͘ in 食。Phāiⁿ 1支雨傘，就想講大概是會tàng 飛天；kha 縛gah phòng-phòng，就想講內底藏1支鐵棍á，giâ--起-來就會tàng 來kap 日本人chhia 拚。Iah 若無，3等ê 中國兵á nah 有法tō͘ phah 贏1等ê 日本兵á？
	這kóa 外省兵á 實在有影chiok m̄ 是款，sì-kè 搶sì-kè sa......，就是án-ne--m̄，鼎--lah、雞--lah、鴨--lah lóng mā kā 人搶搶--去。Ah in koh chiâⁿ 飯桶，講m̄ 知影榻榻米是用來睏--ê-lah，鞋á 穿--leh 就kā 人踏--入-去；看人水道頭chūn--1-下就有水流--出-來，就去五金店買1個水道頭，插入壁內，趕緊chūn--1-下，chiah teh 奇怪，hê，nah 無水出--來......。
	Khah 早罵日本人是狗，尾--á 罵外省á 是豬，狗雖然是pháiⁿ，iáu-koh 會hiáu kā 人顧厝，豬kan-taⁿ 會hiáu 食會hiáu 睏，其他--ê lóng bōe-hiáu。人播田in khioh 稻á 尾。
	......。
	Hit-chūn tiāⁿ-tiāⁿ 是半暝來lia̍h 人，阿彌陀佛--o͘！1-kóa 台灣人，gâu--ê lóng mā hō͘ in thâi 了了，in m̄-chiah 會講台灣無人才。有人才無人才，in ka-tī 心內有數。」
	實在講，這kóa 內容kap 我按書頂面看--來-ê，大約á lóng kāng 款，m̄-koh 女主人講--起-來不止á 活跳，hō͘ 人koh khah 有真實感。當然，i 不時就吩咐góan，千萬m̄-thang kā i 講ê 物件記錄--起-來。
	「Hit 當時，」老先生講：「印尼hia ê 華僑報紙寫講二二八事件是台灣ê 土人來作亂，我看--落實在有影chiâⁿ siūⁿ 氣！」
Kò͘-sū chi jī 故事之2
	以早我bat 寫1篇有關二二八ê 文章，刊tī 校內ê 1份刊物頂kôan。刊--出-來了後，無jōa 久，有1個朋友來 chhē--我。
	「我有看著你hit 篇文章，寫gah bōe-bái，iah m̄-koh 我看會出--來，你這篇文章一定hō͘ in 改--過，tio̍h--無？有ê 所在唸--起-來就無siáⁿ 順。
	「這件tāi-chì 我mā 知影gah 真清楚，góan 老爸不時會向我提起......。坦白kā 你講，góan 老爸kap góan 老母in ê 家族，就是因為二二八chiah 會家道中落，開始衰微。Hit-chūn góan a公就是eⁿ......ká-ná 號做太平區，hit-chūn 龍山區ê 區長就是辜振甫，góan a公是太平區ê 區長，事件發生了後，hiah-ê 人請góan a公出來做頭，góan a公m̄ 敢，tùi 後壁門soan--出-去，chiah 會無tāi-chì。Chit-má góan a公已經死--a。我有1個親chiâⁿ iáu-koh 保存真chōe hit-chūn ê 資料、相片kap 1-kóa 文件，但是lóng 藏--起-來，而且i lóng 無ài 講。」
	後--來我不止1-pái 要求i 設法將hit-kóa 資料chhòng--出-來，i 試過幾-lō pái，可惜lóng 無成功。
	「Góan a舅hit 當時mā tī 區公所做tāi-chì，事件發生了後，警總beh lia̍h人，i 就利用i 工作上ê 方便，用1-kóa 假ê 戶籍資料幫助1-kóa 人順利逃去日本，到尾--á soah hō͘ 警總來通緝，不得已只有逃走，tī 島內並無出--去，一直到刑期過了後chiah tńg--來。Hit 時chūn 警總就lia̍h góan a姨去問話，結果kā góan a姨chhòng gah 精神分裂，痛苦30幾冬，前幾年chiah 死--去。
	「有ê 人lóng 講我偏激，可是有真chōe tāi-chì in 根本就m̄ 知影！」
Kò͘-sū chi saⁿ 故事之3
	《台灣戰後初期的民意代表》這本冊出版了後，引起我對二二八事件ê 關心，自hit-chūn 開始，我注意去蒐集任何有關二二八ê 資料。
	當我tú-á 對二二八有khah 清楚ê 了解，有1-pái，就以che 做題目，講hō͘ 我ê 1-tīn 朋友in 聽。
	講ê 當中，難免有1-kóa 爭論，譬如講：「I án-ne 寫，你就beh 相信是--m̄？」、「Che 無的確是有人thiau-kang beh 來中傷政府--ê。」、「已經to hiah-nī 久--a，lán 專心讀冊就好，無應該談論這kóa 有--ê 無--ê。」......等等。
	其中有1個朋友講：「到taⁿ 我chiah 知影，是án-chóaⁿ góan pa-pa beh 娶góan ma-ma ê 時chūn，góan 媽媽ê 親chiâⁿ lóng 強烈反對，而且到這chūn iáu-koh 一直真排斥góan 爸爸。」
	Chiah-nī 大ê 歷史悲劇，一般人ê 心內難免會用這種簡單ê 二分法，認定外省á lóng m̄ 是好人，致使1-kóa 外省人受著無公平ê 看待。In 老pē 就是外省人，m̄-koh 做人真好，除了有時á 聽i 講話感覺khah 食力以外。
	Koh-khah 害--ê 是，另外1個朋友，in 老pē 聽著我所講--ê 了後，就叫i m̄-thang koh 再參góan 這tīn 人來往，我就是tī in 厝--nih kā 朋友講起這層歷史--ê。
	「我知影--ê kám 會khah chió i 講--ê？」
	Che 是in 老pē 講ê 話。然後對i 講起1-kóa 往事，事後i 對我提起。
	故事並無複雜。In 老pē hit-chūn 10外歲，tòa tī 南崁，有1日，外地扛來1個棺材，掀開來看，倒tī 內底ê 人，是in 細漢時chūn ê chhit-thô 伴，後--來去台北讀書，想bōe 到i......。這chūn ê i，10支chéng 頭á lóng hō͘ 人切去1節，而且ta̍k 支頂頭lóng 插1支針。
	In 老母kā i 講，光復hit-chūn，soah pìⁿ bōe 清楚，到底ka-tī 是日本人iah 是中國人？
	我知影in 老pē 一直無kā 這kóa tāi-chì 放bōe 記，chiah 會tī 將近40年了後，koh 向i ê cha-bó͘-kiáⁿ 提起，只是，i 甘願暗khàm hiah-nī 久，有時á 想起這點，就感覺莫名其妙。
	M̄ 知有jōa chōe 台灣歷史是án-ne 失--去-ê？
	Góan 老pē mā 相siâng，一直到我向i 問起ê 時chūn，i chiah 對我講，講bōe chió，而且講ê 時chūn，頷頸á 筋大細條，bōe 輸kap 人相嚷。
Kò͘-sū chi sì 故事之4
	參加1個營隊，嘴賤，kā 坐tī 邊--á ê i 探問：「你kám 知影二二八事件？」
	「當然知影--a！」這個回答hō͘ 我感覺tām-po̍h-á 意外，我意識著我koh 有機會來聽1個真實ê 故事。
	「Góan 大伯hit 時chūn tú-á 按師範學校畢業，i 1時chhē 無著頭路，就去in 老師hia tàu kha 手，in 老師leh 辦雜誌。叫i 簽名，tah 印á，因為án-ne chiah 會tàng 領薪水，góan 大伯就照做。二二八了後，in 就kā góan 大伯ê 老師lia̍h--去，而且chhē 著名單，照名單lia̍h 人，後--來góan 大伯就án-ne hō͘ lia̍h--去，其實góan 大伯去做mā 做無jōa 久，siáⁿ-mih tāi-chì mā m̄ 知，但是因為有簽名、tah 印á，留證據落--來，beh 救mā 無法tō͘，了後就hō͘ in 銃殺--a。」
	「你nah 會知影是銃殺--ê？」
	「In hit-tīn 人內底，kan-taⁿ 1個無死，hông 放--出-來，好好lóng 無tāi-chì，ká-ná mā 無受著刑求ê 款，i tńg--來以後，kā góan 講góan 大伯已經hō͘ in 銃殺--a。」
	「Ah i 有提起別項tāi-chì--無？」
	「其他tāi-chì pìⁿ tiām-tiām，i lóng 無願意講。」
	我teh 想，這個人會tàng 出--來，無tiāⁿ-tio̍h hām 大筆金錢有關係，若無，就是jiàu-pê-á。
	I 續--落講：「Góan iáu-koh 有1個厝邊，che 是góan ma-ma kā góan 講--ê，in tau 有3個後生。有1暗半暝時，hiông-hiông 聽著in 老母tī 路中央，大聲hoah：「救人--o͘！有人lia̍h 走góan kiáⁿ，有人lia̍h 走góan kiáⁿ！」非常著急。原來是半暝有人走入in 厝--nih，用臭油kā in 後生灌；用臭油灌是bōe 死--去，m̄-koh 會kui 身軀邊lóng 無力，結果就án-ni-siⁿ hông lia̍h--去，siáⁿ-mih 原因hông lia̍h mā m̄ 知。關12年了後chiah 放tńg--來。出--來了後，面肉白晰晰，而且lóng 變chiâⁿ 大kho͘，看--起-來笑khoe 笑khoe。」
	「Ah in kám 有kā lín 講in ê tāi-chì？」
	「無，lóng m̄-bat 講。」
	雖然是苦齣來起頭，路尾soah 是以lio̍h-á 諷刺ê 喜齣來煞尾。
	有ê 故事，按表面上來看確確實實是結束--a！M̄-koh in 大伯ê 死soah kā in 老pē ê 家族帶來麻煩。自hit-chūn 開始，i ê 二伯、三伯kap i ê 老pē，ta̍k 月日lóng 有警察來「拜訪」，所用ê 理由是檢查戶口。In 老pē 到尾--á 參這個警察熟sāi，這個警察就半年來1-pái，in 老爸1-pái 簽6個名。
	「其實kan-taⁿ 簽名nā-tiāⁿ 是無siáⁿ hòe，m̄-koh hō͘ 厝邊ê 人看--著，kioh-sī góan 做siáⁿ-mih pháiⁿ tāi-chì，登記在案，警察chiah 會三不五時就來查。
	Góan pa-pa 無jōa 久chìn 前chiah 過身--去，所以警察無koh 再來，iah m̄-koh góan 二伯、三伯hit-pêng iáu 是ta̍k 個月lóng 有警察去chhē--in。」
	1988年ê 草屯，二二八ê 暗影iáu 無完全散--去，有人繼續為著二二八承擔苦難......。
Kò͘-sū chi gō͘ 故事之5
	「我當然mā 是知影--lo͘！Góan ma-ma kā 我講--過，i 叫我m̄-thang kā 人講......aih！橫直你ah m̄ 是國民黨ê jiàu-pê-á，kā 你講mā 無siáⁿ-mih 關係，m̄-koh 你m̄-thang kā 別人講o͘-o͘！Góan 媽媽有1-kóa 親chiâⁿ，tī hit-chūn hō͘ 國民黨軍隊lia̍h--去，差不多lóng 無倒tńg--來，一定是死--a！Chhun 幾個有tńg--來nā-tiāⁿ，但是lóng 已經起siáu--a。」
	「我iáu-koh 有1個舅公，góan pa-pa ê a舅，hit-chūn 是1個醫生，厲害--neh！Koh 是東京帝大畢業--ê。Siáⁿ 人知影án-chóaⁿ 樣，hit-chām-á 就hō͘ 1-kóa 兵á lia̍h--去，就án-ne hō͘ in 銃殺。」
	Che 是我室友kā 我講--ê，i 是苗栗ê 客人。
	「你問che beh chhòng siáⁿ？我kā 你講，你上好是mài kap 人講che......若無，你無好結尾beh án-chóaⁿ？」
Kò͘-sū iáu-bē soah 故事iáu 未煞
	第一個發現的人 不知道將它繪在航海圖的哪個位置 它是徘徊北回歸線的島嶼 擁有最困惑的歷史與最衰弱的人民 ──劉克襄《福爾摩莎》
	二二八事件，對台灣來講，m̄ 是小khóa tāi。日本統治ê 時chūn，台灣人民對祖國ê 美麗幻夢，tòe 戰後這kóa 「生雞卵無，放雞屎有」ê 中國軍隊、官員，過來台灣了後發生ê 食錢、經濟混亂、政治無清明、社會無穩定......soah 來破滅，tī ta̍k個人心肝頭重重koah 1-sûn。總算tī 1947年2月27 暗時，為著查緝私薰處理無妥當，爆發全島tín 動ê 二二八事件。了後屠殺、清鄉，台灣人hō͘ in háⁿ--著soah 來tám--去，自án-ni，ná 像重新來面對另外1個殖民統治ê 政權。台灣精英分子死chiâⁿ chōe，部份無死--ê mā 入去「進修」1段無算短ê 歲月。1-kóa 人流亡海外，繼續in 未完成ê 夢......
	普普á 講--起-來，經歷過這個事件ê 人，大部份lóng 無願意kā in 後輩提起，但是koh 無法tō͘ kā i 放bōe 記，一旦提起，ná 像是幾工前á chiah 發生--過-ê kāng 款；受過「皇民化教育」ê 新1代，有ê開始放sak ka-tī 本底ê 語言，大部份m̄ 是m̄ 知影二二八，就是聽過這個名詞soah 無siáⁿ-mih 概念，一廂情願來認為台灣一「光復」，苦難就結束，tī 大有為政府領導之下愈來愈民主，愈來愈進步，對『一小撮野心分子』bōe 輸ká-ná 恨入i ê 每1支神經線，kiàn-pái 想著這kóa 人就來lia̍h 狂；真chōe 大官虎，大概是將二二八當做是幾nā 年前發生ê tāi-chì，無siáⁿ-mih 稀罕。
	有1位研究台灣史ê 老師bat 提起：「戰後到這chūn，台灣歷史上上重要ê 2件tāi-chì，1個是二二八，另外1個是土改。Iah m̄-koh 這2項tāi-chì，政府到這chūn lóng iáu 未kā 資料公開--出-來，民間ê 資料已經bōe 少是另外一回事，主要是án-ni-siⁿ 就無法tō͘ 做進一步ê 研究。
	Chit-má tī 台灣ê 學者，差不多lóng m̄-bat 去過中國，iah m̄-koh in ê 研究，大部份lóng 是中國--ê，lán kā 看，這kóa 學術論文若提出去國際上，kám 會有siáⁿ-mih 權威性？無--mah，che 真明白，可比講做日本ê 研究，是tī 日本做iah 是tī 台灣做，資料會khah 齊全，而且koh 會得著學術上ê 承認？」
	Tī 國民黨政權統治ê 時，lán 確實有人為著研究台灣史走去島外，kan-taⁿ 因為hit-pêng ê 資料khah 公開，khah 齊全，而且bōe 受著莫名其妙ê 迫害。另外1方面，統治者ê 口號按siáⁿ-mih 『一年準備兩年反攻......』一直到『三民主義統一中國』、『本土化』，愈hoah 愈kiu 水、愈hoah 愈軟kha、愈hoah 愈無siâu、愈hoah 愈細聲，尾--á-leh？到底得著siáⁿ-mih？
	40外年來，lán tī 互相欺騙中過日子。統治者應該ài 知，嘴唸阿彌陀佛，身藏thâi 牛刀這款咒誓兼phùi-nōa ê àu 步絕對無擋頭。有1個同學，in 老pē teh 種田，i kā 我提起，in 老pē kap 朋友teh 開講，聽in ê 口氣ná 像lóng 是kā 國民黨政府當做是外族來看待kāng 款。Che 絕對m̄ 是講1個影生1個kiáⁿ。
	有時á 想--起-來不免感覺諷刺，「新皇民」甚至知影幾百年前、幾千年前ê 中國歷史、世界歷史，但是叫in 面對幾10年前ê 台灣歷史就好，in 頭殼內底soah 空空空，空到連半sián 都挖無。二二八？Ká-ná 聽--過，m̄-koh 無siáⁿ 清楚是有影；南洋戰爭，chhé！1條線á 烏白牽，南洋kap 台灣nah 有siáⁿ-mih 關係？蔣渭水、林獻堂，hit個是siáⁿ-mih 人？日本時代？Ô͘，hit-tang-chūn ê 台灣同胞tī 日本帝國主義ê 壓迫下，一直寄望祖國軍隊來解救，祖國ê 軍隊也不時teh 想法tō͘ 早日來光復台灣......。天--a！準若kā i 講日本時代台灣人就已經有ka-tī ê 報紙有ka-tī ê 政黨，農民運動bat 真熱烈tī 全島展開，台灣共產黨bat 提出台灣民族這個論點，台語白話文運動tī 刊物頂頭討論gah chhiāng-chhiāng-kún......ê 時chūn，i hōan-sè 會氣phut-phut 應你1句：「Hǹg！你騙--人！」
	數10年來，真chōe 台灣歷史tòe 著1-kóa 人ê 死--去來失散。數百年來，tī 這tè 土地頂kôan，ta̍k-ê lóng chiâⁿ 健忘，hē 性命追求生活創造生活，mā hē 性命將ka-tī ê 過去放hō͘ bōe 記，別人gín-á 死bōe 了，ka-tī 顧命khah 重要。自來，1個政權接1個政權，統治者講lán 是siáⁿ-mih lán 就是siáⁿ-mih。任征不平任反不成，lán 繼續teh 適應新ê 環境，無問為siáⁿ-mih。
	二二八ê 亡魂猶原teh 遊蕩，in ê 死體bat tī 廣場hō͘ 日頭phak，hō͘ 雨水lâm，in ê 死體bat tī海--nih hō͘ 海湧sak 過來koh sak 過去，in ê 死體bat kā 河水染gah 變成紅色；in ê 骨骸，有ê 沈tī 河底、海底，有ê tī 塚á 埔......。
	二二八ê 亡魂猶原teh 遊蕩，主事者有ê tī 島外安享晚年，有ê iáu-koh tī 島內hē 性命put 錢；in ê kiáⁿ 孫有ê 變做大官虎繼續享受榮華富貴。
	二二八ê 亡魂猶原teh 遊蕩，in 無得著平反；in ê 遺族飽受精神ê 拖磨、朋友ê 疏離，無得著任何賠償；in ê 親chiâⁿ、in ê 朋友有人iáu-koh 活tī 暗影之中，m̄ 敢向後1代ê 人提起。
	二二八ê 亡魂猶原teh 遊蕩，1987年掌櫃--ê(俞國華)講hit 時chūn chiâⁿ 亂，政府並無iáu 未公佈ê 資料，koh 講二二八ê 傷痕早就已經平息。Bōe 輸teh hām 眠。
	二二八ê 亡魂iáu-koh teh 遊蕩，1988年ê 官方講法小khóa 改變，公佈楊亮功ê 報告表示大有為政府真開明；戽斗--ê(李登輝)講ta̍k-ê ài ǹg 前看，無應該ǹg 後看，二二八交hō͘ 歷史家來研究就好。可能i 是m̄-bat 聽過『鑑往知來』這款話。
	二二八ê 亡魂iáu-koh teh 遊蕩，西德總理布朗tī 1個猶太人ê 追悼會上，tn̄g 波蘭人面頭前跪--落-來；南韓盧泰愚政權對光州事件公開表示道歉；lán 有1-kóa 傳播媒體是án-ni 來寫--ê：he 是khah 早ê tāi-chì，chit-má ê 政府無必要來負這個責任。
	二二八ê 亡魂iáu-koh teh 遊蕩，當事者、目擊者ûn-ûn-á 來凋零，「皇民化運動」製造--出來ê 新皇民soah 1日比1日chōe。
	二二八ê 亡魂iáu-koh teh 遊蕩，ka-tī ê 歷史ka-tī 無愛去khà，交hō͘ 學者就會ēng--ê，公開紀念二二八，一定是別有居心，故意beh 來挑起仇恨？
	二二八ê 亡魂iáu-koh teh 遊蕩，有1遍二二八和平日講演會中，陳永興講：「是án-chóaⁿ ài hiah-nī 聽in ê 話？In 無beh hō͘ lán 記念，無beh hō͘ lán 放假，2月28 hit日，lán 就ka-tī 無愛去上課，無愛去上班，ka-tī 來紀念，tio̍h--無？」
	二二八ê 亡魂iáu-koh teh 遊蕩......。
	最近，真歡喜看著鍾逸人先生有關二二八ê 回憶錄來出版，hō͘ lán 會tàng 有koh khah 曠闊ê 觀點來看待二二八。
	其實，lán ê 歷史會sái 靠ka-tī 來挽救，並無têng-tâⁿ。除了ǹg 望當事者ka-tī 來寫回憶錄以外，lán 若有閒ê 時，mā 會sái kā 老pē、老母、a公、a-má，或者是a叔、a伯......in 序大人問起khah 早ê tāi-chì，若有可能，上好是詳細將人物、地點、時間、人物ê 背景、tāi-chì ê 經過lóng 總記錄--起-來，一旦記錄--起-來，就是1份珍貴ê 歷史，準若目前因為現實ê 考慮，無適合發表，等以後chiah 來出土也bōe 慢。
	鼓不打不響，燈不點不iâng，lán 做夥來phah 拚，力量mā khah 會tàng 發揮，總--是m̄-thang 蹧躂(chau-that) lán 美麗家園ê 歷史！