最近修改日期： 2007/2/8      最近閱讀日期：2012/1/28      Iûⁿ Ún-giân 楊允言
羅馬字部分iah未完成，若beh鬥saⁿ-kāng請聯絡管理者

0
Mi-io-me, e-he-ia-a-oe O---- mi-io-me, e-he-ia-a-oe A-ta-pe-vo-so, na-na-lo O---- mi-io-me, e-he-ia-a-oe O---- mi-io-me, e-he-ia-a-oe	Mi-io-me, e-he-ia-a-oe O---- mi-io-me, e-he-ia-a-oe A-ta-pe-vo-so, na-na-lo O---- mi-io-me, e-he-ia-a-oe O---- mi-io-me, e-he-ia-a-oe
Che sī chi̍t-tiâu Cho͘-cho̍k ê khan-bông-koa, sī góa o̍h ē-hiáu ê tē it -tiâu Cho͘-cho̍k koa-iâu, koa-sû ê ì-sù sī an-nē :	這是一條鄒族ê 牽亡歌，是我學會曉ê 第一條鄒族歌謠，歌詞ê 意思是按呢：
Sí--khì ê bông-hûn a Tńg-khì thiⁿ-téng pah Chhiáⁿ Thian-sîn lâi chiap-la̍p Ge̍h-niû a Lí tio̍h ín-chhōa bông-hûn lâi tńg	死去ê 亡魂啊 轉去天頂吧 請天神來接納 月娘啊 汝著引chhōa亡魂來轉
	其實，我一直m̄ 知影，tī 原住民運動中，咱chit-kóa[這些]漢人應該khiā[站]tiàm 啥麼款ê 所在。
	有時仔我tih想，假使咱beh關心原住民ê 問題，咱是m̄ 是 愛先有一兮「內化」ê 過程？Tō是講，咱應該暫時放棄咱漢人ê 身段，先變做 原住民，kah in做伙生活，然後chiah有法度用in ê 角度來看chit-kóa in所tú 著ê 問題。
	但是chit點我mā 做iah未kàu。
	以前tī 馬祖做兵ê 時陣，連上有幾ê 原住民，in pat lim酒了後，光天化日下khiā tiàm 路邊放尿，一半pái 仔會起酒siáu，mā 會去８３１(軍中妓院)開查某；m̄-koh，有一件hō͘ 我印象真深ê 代誌是，有一個tih-beh退伍ê 原住民，因為hit陣khah自由，伊家己走去 山頂，轉來ê 時挽真chōe 草仔，煮煮ê 著the̍h來食。東島(東莒)閣pat 發生一件代誌，一個原住民兵仔逃兵，bih tī 山頂(東島無超過四平方公里)，永過ê 逃兵lóng是一、兩工tō hōng lia̍h著，因為 in khah有野外求生ê 能力，經過一禮拜iah是無lia̍h 著，taⁿ chit聲害a，是beh按怎chiah好？結果有一工，伊走去東島ê ８３１ lim酒，tō按呢hōng lia̍h 起來。
	一般來講，台灣ê 原住民有九族，這是人類學家ê 分法，按呢ê 分類，對原住民in是m̄ 是妥當，可能mā 真phái 講，in ê 族群意識 基本上是用部落做單位，部落ê 人數若siuⁿ chōe，可能著有一kóa人 會分出去，閣chhē另外一個所建立新ê 部落，mā 有khah無勢力ê 部落歸化 入去別ê khah強ê 部落；另外，若是phah獵ê 所在兩個部落有重tha̍h，按呢tō會結冤仇，人類學下腳，hōng 分tī 仝一族ê 各部落，有可能是世仇；因為環境ê 關係，有ê 族群漢化khah深，若是tòa tī 深山林內ê，in ê 生活方式khah有法度保存，mā 會hō͘ 咱感覺in看起來káⁿ-ná khah phái 淡薄仔。
1
	今年 (1993)七月，我參加台原基金會所辦ê「鄒族生活營」，tī Tfuya(特富野)部落，對我chit個罕得走山頂ê 人，參加活動ê 原因，大部分是因為感覺趣味，無的確tī 面對另外一個族群ê 時，mā 會tàng hō͘ 我一kóa 刺激。
	四工ê 活動中，老師 lóng 是鄒族人，學員 lóng 是漢人，有人學 音樂,所以beh[要]來聽in唱歌；有ê 學森林，所以beh來了解生態保育ê 問題；mā 有做服裝設計ê，對in ê 傳統服飾有趣味；有人kah其他原住民族群已經有 接觸，趁chit-ê 機會來chia[這裡] 看māi 仔；有ê 已經tī 山跤[kha,腳]，讀過真chōe 資料，beh來山頂求證；當然，mā 有一kóa 像我按呢共款 [kāng-khóan,一樣]一箍癮癮[giàn]，著走起來山頂。
	Miiome 是第二工暗時一ê 老人教阮唱ê。
	鄒族分佈ê 所在，主要是tī 嘉義阿里山鄉其中ê 七ê 村，屬北鄒；另外，高雄三民鄉kah桃源鄉mā 有一kóa，屬南鄒，南鄒kah Bunun(布農) tòa[住]做伙，人數閣少，khah Bunun 化，危機意識mā khah重，所以，見若[每次]北鄒有祭典，in lóng 會來參加。 lóng 總加起來，鄒族ê 人數大約仔 是五、六千ê[個]。
	In家己稱呼in chit-ê 群體叫Chó͘,所以有人認為「曹族」 是錯誤ê 講法。我想，這是以華語思考所得著ê 結論；事實上，日本時代著有 「曹族」chit款稱呼，hit-ê[那個]時陣，台灣並無華語ê 環境，「曹[chô]」 kah「鄒[cho͘]」ê 發音beh仝仔beh仝，無應該講「曹族」是m̄ 著ê 稱呼。
	阮坐嘉義市公車ùi[從]嘉義車頭[車站]坐kàu[到]Tapangu (達邦),Tapangu 是一ê 部落，mā 是Tapangu 村ê 行政中心，對[從]chia[這裡] 行入去，40分鐘左右會tàng kàu Tfuya 部落，Tfuya 部落，tī[在]行政單位ê 觀點，是將伊劃tī Tapangu 村，這hō͘ Tfuya ê 鄒族人感覺心內礙虐礙虐 [gāi-gio̍h,尷尬],因為tī khah早ê 時，in小可[sió-khóa,稍微] 有敵對ê 關係。
	阮著tòa tī Tfuya ê 教堂內。chit-ê 部落有一百戶左右， 阮去ê 時陣， 村內ê 人真chōe lóng 無tī ê， 走去山頂種山葵， 山葵會tàng 做 oasabi[芥茉]， 愛種tī 日頭曝bōe 著ê 樹林內， 所以大部分是種tī 國有林地內， 橫直[反正]bōe 去挫[chhò，砍]樹仔， 無礙著。種山葵對族人來講是一項真好ê 收入來源， 當然， 歸ê 產銷管道iah是[還是]控制tī 漢人手頭。可能因為按呢， 查甫人留tiàm 山頂ê bōe 少， kah別族比起來， 去都市工地做工ê 比例著khah少， m̄ 閣查某囡仔嫁去平地敢那[好像]真普遍， 致使留tiàm 山頂ê 查甫人娶無某， 若按呢落去， 總是有淡薄仔滅種ê 危機存在。另外， Tfuya 有兩間敢仔店[雜貨店]， lóng 是漢人開ê， in為啥麼beh[要]來山頂? 是因為原住民khah好騙， iah是山跤tòa bōe 落去chiah[才]走路來山頂？
	根據傳說， 鄒族是ùi[從]玉山來ê， 尚[最]強ê 時陣， 勢力 kàu kah台南ê 安平， tī in身軀頂ê 裝飾有海邊ê 螺仔殼， 表示in kah大海有 接觸過， 聽講有ê 部落， 族人看起來有歐洲人生張， 照按呢來sak[推論]，可能荷蘭人 來ê 時， 血統小可[稍微]有濫著。
	講kàu 傳統服飾， mā 真有特色， 一項一項沓[tha̍h，疊] 起哩， 不止費氣； 有phah[打]過熊ê 人， chiah[才]會使將有熊毛ê 飾物縛[pa̍k， 綁]tī 頭頂； 有phah過山豬ê， chiah有資格用山豬嘴齒編成ê 旆鍊[phōa-liān， 項鍊] 掛tī 頷頸[脖子]； phah過幾隻野獸， chiah會tàng tī 佩刀頂面劃幾巡 ，......， 一切照步來， 無tih kāng 相騙。
	鄒族ê 祭典主要有Mayasvi(戰祭) kah小米豐收祭， 有ê 祭典 並m̄ 是tī 固定ê 時間舉辦， 由長老根據伊暗時做ê 眠夢來決定beh辦iah是無愛 辦。chit-má[現在]交通利便， 祭典 lóng 會引來真chōe 觀光客，所以， 祭典無的確會 愈來愈形式化。部落ê 精神象徵叫做 Kuba ， 著是男子會所， 查某ê bōe-sái [不可以]peh[爬]起哩， 出世初登會所禮、成年禮iah閣所有ê 祭典 lóng tī Kuba ，Kuba邊a 有廣場， 閣有一欉大葉榕[chhêng](雀榕)， 是鄒族ê 神樹。
	講著語言， 畢竟in是tòa-tī 山頂ê 民族， 山勢、地形若是 小可有一ê 變化， 著有一ê 地名。In語言流失ê 情形真嚴重， 而且鄒族話以外， 華語比福佬話用khah chōe[多]； 教堂逐[ta̍k，每]工向族人廣播ê 時，鄒語、華語 濫做伙用， m̄ 閣華語khah chōe。岔開話題， 咱對chia[這裡]來反省福佬話ê 情形， 其實， 一ê 族群有一ê 族群ê 特色， beh[要]用另外一種語言來表達總是加減會 精差iah是無完全； 基本上， 華語tī 台灣， 並無倚近chit塊土地， 比一kóa 例來講， 華語講「螃蟹」， 福佬話著有毛蟹、蟳[chîm]、chhì 仔……等等ê 分別， 閣親像 華語ê「吃」， 福佬話著有食[chia̍h]、sut、hut、孝孤、啖[tām]sám等等語感 無仝ê 語詞， 用咱家己ê 語言來了解咱ê 生活環境是尚介siak-phah [適切]ê， 但是， 為啥麼chiah-chōe[這麼多]台灣人beh[要]放棄家己ê 語言 ？
2
	學員 一直kā 老師問問題， 我只是感覺逐家下[he]性命tih kā in ó͘[挖] 物件真m̄ 好， m̄ 閣趁著chite5 互相溝通ê 機會， 無問mā 是真phah損[可惜]。
	In教阮按怎舂[cheng]米 ， 舂kah變粉ê 米beh按怎做酒； 我 第一遍舂ê 時， 秘訣lia̍h 無著， 家己mā 感覺姿勢真phái 看， 第二遍以後著小可 有架勢出來， in講我舂了尚好， 但是我兩手手蹄仔[手心]phòng-phā[起泡] ， 閣 破去， 腰酸手mā 疼。in教阮beh按怎做陷阱來lia̍h 鳥仔、tng膨鼠[松鼠]、射熊、 拐山豬入去......。In教阮按怎做竹筒飯。in kah阮做伙唱歌。......
3
	四工 ê 活動， 留真chōe ê 問題落來。
	有時仔我tih想，一大陣人走去一ê 部落， 部落ê 人應該無啥 歡迎，因為按呢會攪擾著in ê 生活。整體來講， in ê 個性khah開朗， khah活潑，對 朋友ê 感情真實， 無漢人ê 奸巧[khiáu] 。長久以來， 原住民kah漢人ê 接觸， 差不多 lóng 是原住民食虧， in對漢人ê 印象自然無好。chit-má iah閣真chōe 漢人 kā in叫做「番仔」， 無將in當做人來看待。可能因為按呢， 漢人ê 宗教傳bōe 入去 ， 但是神父來kàu 山頂， 對in有尊重， 結果天主教、基督教真緊著phah入去in ê 生活， 取代in原來ê 宗教信仰。宗教ê 入侵， 無的確帶hō͘ in一kóa 好處， 問題 是chit款宗教排他性強， 叫汝愛信上帝， 信上帝ê 人chiah[，才]會tàng 上[chiūⁿ ] 天堂， 拜其他ê 神bōe-sái， 結果著tī 神父ê 煽動下， Tfuya ê Kuba 倒去， 神樹大葉榕mā 剉掉， 剉掉無打緊， 閣撒[sà] 鹽tī 頂kôan， beh hō͘ 伊發bōe 出來。 ( Tfuya ê Kuba 今年二月重起， 神樹mā 閣發起來， m̄ 閣khah細欉。 )
	對統治者來講， 伊求ê 是管理上ê 利便， khah bōe 去考慮著 族群之間ê 差異性。山地保留區iah是其它相關ê 政策， 限制著in原來ê 生活方式， 自底[本來]in phah獵， 自底in游耕； 行政區域ê 劃分， 有ê 並無尊重in ê 情形， 可比Tfuya hōng 分tī Tapangu村； 另外， 原來是一ê 頭人， chit-má 閣加一ê 村 長， 按呢族人應該愛聽啥人ê？ 換過來講教育， 現此時ê 教育體系， 基本上mā 是 漢人ê 體系， 加上人數ê 差別， 一旦一ê 原住民進入chit-ê 體系， 伊愛面對 chōe-chōe ê 漢人， 文化背景ê 差異閣大， in讀愈kôan[高]， 漢化ê 機會mā 愈大， 若按呢， 教育對in是好iah是bái[糟糕]？
	事實上， 人數少本身著真值得煩惱， 若準部落khah開放， 驚會hōng 同化去， 但是假使保護了siuⁿ 厲害， tè[跟]bōe 著現代化ê 跤步， kah社會mā 會愈脫節， 一旦離開山頂， 真phái 適應漢人社會， 若按呢， 對in kám 有公平？ In tih講台灣猴[台灣獼猴]受保護， 但是鄒族ê 人數可能比台灣猴khah少， 動物愛保護， 人kám 著免保護， 據在in消失去 ？
	我知影我對in ê 了解siuⁿ 少， m̄ 閣我tih想， 真chōe in tú 著ê 問題， 咱m̄ 知愛按怎解決chiah著， in家己mā 可能m̄ 知影beh 如何是好。
4
	Iah閣 [還]有一ê 是屬咱漢人本身ê 問題。最近幾年來， 原住民運動當tih發展， 原住民 ê 問題mā 得著愈來愈chōe 人ê 重視； chit-pái[這次]ê 營隊， 參加ê chit-kóa 漢人內底， 包括福佬人、客人， 但是in普遍對家己本身ê 文化無啥了解， 尤其閣khah bōe-tàng 忍受ê 是， in已經差不多變做「北京人」a ， 家己ê 根底 著無在[chāi，穩] ， 按呢， 是有啥麼才調來關懷別人？
5
	細漢 時陣讀過吳鳳ê 神話， 後來chit-ê 神話hō͘ m̄ 是鄒族ê 其他族群將伊phah破， 按呢看起來， 鄒族ê 自覺其實真òaⁿ[晚]。最近， in ê 智識青年有覺醒， 開始tih 採集in鄒族ê 傳說、故事， 由台原出版社出版(《鄒族的風土與神話》)， 《鄒族語典》 最近mā beh出版a ； 講起來， 鄒族可能真好運， kah其他ê 原住民比起來， in iah閣 保留真chōe 物件，所以， 有人開始tih做， hō͘ 族人信心， 按呢落去， 整體族群自覺 ê 跤步應該會khah緊， 另外一方面， 書有出版， mā 會tàng 得著外界khah-chōe ê 了解kah關心； iah閣有一ê 好消息， 著是鄒族ê 母語教育今年九月mā beh開始 a。
6
	Tī Tfuya 四工， kan-na[只] 學著鄒族話一ê 詞: 「朋友」in講「o͘-á-hńg」， kah 福佬話「芋仔園」真倚[óa，近] ， 其它ê 著 lóng 無記落來， 實在是見笑代。
	歌謠來講， in先教阮Miiome chit條真好聽ê 牽亡歌， 可能是 因為歌詞kah meloti[旋律] lóng 真簡單、好記， 連鞭[nia-mi，馬上] 著學會曉a， 後來in 雖然閣有唱真chōe 歌， 總是我 lóng 無法度記落來。
	Chit-pái 族群接觸ê 經驗雖然是真粗淺， 總是對我ê 刺激 猶原[仍然] chiâⁿ[很]大。轉來了後， 我不時會唱起Miiome 。
	Kah福佬話ê 牽亡歌比起來， 伊加chiâⁿ[很]淒涼， 尤其是 暗時tī 山頂唱ê hit[那]種感覺。
	我若唱起Miiome， in ê 天神kám 會聽著？ 伊若看著鄒族 chit-má ê 處境， 伊會艱苦bōe ？
O ---- mi-io-me， e-he-ia-a-oe	O ---- mi-io-me， e-he-ia-a-oe