最近修改日期： 2007年10月30號早起時      最近閱讀日期：2008年11月21號下晡時      Iûⁿ Ún-giân 楊允言
羅馬字部分iah未完成，若beh鬥saⁿ-kāng請聯絡管理者

1
( Ji̍t-kì, 1987 nî 7-ge̍h 17-hō, khì Chiong-hòa Jī-súi chham-ka ' khòai-lo̍k lông-ka thé-giām-iâⁿ ' tē jī kang . )	（日記，1987年7月17號，去彰化二水參加「快樂農家體驗營」第二工。）
Pòaⁿ-mî chiok liâng ê, it-ti̍t cheng-sîn. Sì-tiám-pòaⁿ chó-iū, thiⁿ í-keng phah-phú-kng, tō peh khí-lâi sì-kòe kiâⁿ-kiâⁿ leh. Lō͘ siōng nā tú-tio̍h o͘-jí-sáng iah-sī o͘-bá-sáng ê sî-chūn, in lóng ē kah lí sio-chioh-mn̄g.	半暝足涼 ê ，一直精神。四點半左右，天已經phah-phú光，tō peh 起來四界行行leh。路上若 tú 著o͘-jí-sáng iah是o͘-bá-sáng ê 時陣， in lóng 會 kah你相借問。
Āu--lâi kiâⁿ chhân-hōaⁿ-lō͘, kiâⁿ kàu chi̍t-keng chhù thâu-chêng, khòaⁿ-tio̍h chi̍t-ê o͘-jí-sáng, hân i sio-chioh-mn̄g liáu-āu tō tiàm hiâ khai-káng -- khí-lâi a. I sìⁿ Tân, chhit-cha̍p thóng hè, in hāu-siⁿ lóng khì Pak-pō͘ chia̍h thâu-lō͘, chhun i chi̍t-lâng tiàm chiâ kò͘ kin-chio-hn̂g. Pún-chiâⁿ kan-na chhìn-chhái khai-káng khai-káng niâ, m̄-koh kóng bô gōa-kú, i sûi kóng tùi Lâm-iûⁿ chiàn-cheng khì. Khó-lêng sī góa Tâi-gú thêng-tō͘ khah bái, i mā khah ū-hè a, kóng-ōe koh ū sió-khóa làu-hong, i kóng ê góa pēng m̄-sī lóng thiaⁿ ū, jî-chhiáⁿ kóng-ōe it-ti̍t têng-ho̍k.	後來行田岸路，行 kàu 一間厝頭前，看著一個 o͘-jí-sáng， hâm 伊相借問了後tō tiàm hiâ 開講起來 a 。伊姓陳，七十thóng歲，in後生 lóng 去北部食頭路， chhun 伊一人 tiàm chiâ 顧芎蕉園。本chiâⁿ kan-na 凊彩開講開講 niâ ，m̄-koh講無外久，伊隨講對南洋戰爭去。可能是我台語程度 khah bái，伊mā khah有歲a，講話koh有小khóa 漏風，伊講 ê 我並 m̄ 是 lóng 聽有，而且講話 koh 一直重覆。
I kóng, Jī-súi-hiong tī Ji̍t-pún sî-tāi hō-chòe Jī-súi-chng, chôan chng ū cha̍p-it lâng hông tiàu khì Lâm-iûⁿ chòe-peng, lóng ū tńg--lâi. In chū-siú ê só͘-chāi ( bô thiaⁿ chheng-chhó ) tōe-sè hó, Bí-kun phah bōe khí-lâi, nā-bô tō-sī chûn khì tiâu tī hái-káng gōa-kháu.	伊講，二水鄉 tī 日本時代號做二水庄，全庄有11人 hông調去南洋做兵， lóng 有轉來。 In 駐守 ê 所在（無聽清楚）地勢好，美軍 phah bōe 起來，若無tō是船去 tiâu tī 海港外 口。
Góa mn̄g i niû-si̍t kám ū chhiong-chiok ? I kóng chū-pún it-ti̍t lóng bô būn-tôe, bé--a chiah ū khah khiàm, m̄-koh po͘-tūi ka-kī ū tih chèng-chok. Góa koh mn̄g i Chiong-chiàn liáu-āu án-chóaⁿ tńg Tâi-ôan ê ? I kóng Chiong-chiàn bô gōa-kú tō hông chài --tńg-lâi a .	我問伊糧食敢有充足？伊講自本一直 lóng 無問題，尾 a chiah 有 khah 欠， m̄-koh部隊家己有tih 種作。我 koh 問伊終戰了後按怎轉台灣 ê ？伊講終戰無外久tō hông 載轉來 a 。
I tī Tâi-ôan ê sî, siū kè la̍k-tang ê kàu-io̍k, āu7-lâi hông tiàu khì chòe-peng. Tī i ê ìn-sióng tiong, Ji̍t-pún ê tōa koaⁿ-lâng lóng bōe bái, tiāⁿ-tiāⁿ ē kā pō͘-hā kóng, Ji̍t-pún-lâng siū ê kàu-io̍k khah hó Tâi-ôan-lâng, só͘-í, Ji̍t-pún-lâng ài kā Tâi-ôan-lâng tòng-chòe chhin sió-tī lâi thiàⁿ-thàng, Tâi-ôan-lâng nā ū bōe-hiáu ê só͘-chāi tio̍h-ài ū nāi-sim kā kà, m̄-thang phah, m̄-thang mā. M̄-koh ū ê Ji̍t-pún-peng tō chin ài khi-hū Tâi-ôan-peng, siáⁿ-mé tāi-chì lóng kiò Tâi-ôan-peng chòe, ka-kī m̄ tāng-chhiú, hāi i khì kah ū chi̍t-pái cháu lī-khui i ê sió-tūi tńg-khì chóng-pō͘, chóng-pō͘ ê lâng kā i lia̍h --khí-lâi, beh kā i tong-chòe tô-peng lâi chhú-tì, i tō kā in kóng, ká-súgóa chin-chiàⁿ beh soan, nà ē koh cháu lâi chóng-pō͘ ? Tō-sī in-ūi Tâi-ôan-peng hông khi-hū kah kàu-kàu .	伊 tī 台灣 ê 時，受過六冬 ê 教育，後來 hông 調去做兵。Tī 伊 ê 印象中，日本 ê 大官人 lóng bōe bái， tiāⁿ-tiāⁿ 會 kā 部下講，日本人受ê教育 khah 好台灣人，所以日本人愛 kā 台灣人當做親小弟來疼thàng，台灣人若有 bōe 曉 ê 所在著愛有耐心 kā 教， m̄-thang phah 、 m̄-thang罵。M̄-koh有 ê 日本兵tō真愛欺負台灣兵，啥麼代誌 lóng 叫台灣兵做，家己 m̄ 動手，害伊氣 kah 有一擺tō走離開伊 ê 小隊轉去總部，總部 ê 人 kā 伊 lia̍h 起來， beh kā 伊當做逃兵來處置，伊tō kā in 講，假使我真正 beh soan ，哪會koh走來總部？Tō是因為台灣兵 hông 欺負 kah 夠夠。
	伊講伊身體真勇，會tàng 做真 chōe 粗重 ê 空khè ，交 hō͘ 伊 ê 空khè lóng 會tàng 提早完成。 Tī hiâ 死去 ê 戰友，大部分 lóng 是破病死 ê 。伊 koh 講 hit 時陣全台灣 kan-na 一個 少將， kah 這má 無 kāng款。
	6:10左右 tn̄g著伊，一直聽伊講 kàu 6:40，因為 beh 趕7:00轉去食早頓，只好將伊 ê 話 phah 斷，感覺歹勢歹勢。
	我真後悔我無 chhôan 錄音機， m̄-koh 實在太過突然。 Tī 這進前，我對南洋戰爭 ê 了解是 ùi 李喬 ê 「寒夜三部曲(三)孤燈」來 ê 。聽這個 o͘-jí-sáng講了後，我對南洋戰爭開始有感覺， hō͘ 我清清楚楚意識著，台灣人為著這場戰爭付出代價，四十幾冬前發生 ê 代誌，是按怎伊一直 bōe-tàng放 bōe 記， koh 是按怎咱 ê 課本無 beh 向咱提起？
2
	（日記，1988年2月初4去南投集集參加農權會所舉辦 ê 「農村生活營」，2月初6 kah 林兩人 hông 分配去苗栗卓蘭， kah 果農 tòa 做伙。我特別問主人，敢有親情 pat hō͘ 日本仔調去南洋？伊講有，2月初10早起 chhōa 阮去 chhē 伊，m̄-koh伊無 tī leh ，10點外 ê 時陣伊家己騎o͘-tó͘-bái來主人 chiâ ， tiàm chiâ 向阮講起這段往事。）
	伊姓蔡，今年七十一歲，客人底，客話、鶴佬話 lóng 會曉，溝通 ê 時用鶴佬話（因為阮 bōe 曉講客話）。無錄音是我 siōng 大 ê 錯誤。
	伊二十七歲 ê 時 hông lia̍h 去做軍伕，卓蘭有三十 ê 去，新竹州 ê 軍伕 lóng 先 tī 新竹集合，了後亦無訓練，著送去高雄坐船出港，坐三暝三日 kàu 馬尼拉， tiàm hiâ 停留兩工， koh 坐船去ma-to͘-kha-li，這算是一個 大島， in tī ma-to͘-kha-li邊a ê 小島lun-pho͘-lu tòa ， tī hiâ 做工，整理機場。
	Tī lun-pho͘-lu tòa 差不多一冬，伊 hông 編 tī 第九伙。後來啄鼻仔（美國人） phah 過來，這 pêng ê 飛行機連飛都飛 bōe 起來，無啥 phah tō輸輸去，走入山內，無thang食，食鹿角草。 In 百外人做伙，有當時仔幾lō個人半暝仔出來偷 the̍h 倉庫 ê 物件，啄鼻仔 mā 會 tī 一 kóa 所在 khǹg 糖仔、牛肉罐頭， in mā 會 khioh 著啄鼻仔 ê 傳單，傳單 ê 內容 lóng 是叫 in 出去投降 ê ，m̄-koh in lóng m̄ 敢出去投降，因為 hit 當陣仔日本人有 kā in 講，假使 hō͘ 啄鼻仔 lia̍h 去， in 會 kā你tok 做肉醬。
	我問伊對日本仔 ê 印象是好 iah是bái？伊講 chiâⁿ bái， hit 陣分配一人一包米 ê 時陣，日本人 in 先分，搶好 ê 去， chhun ê chiah hō͘ 台灣人分，一個 人差不多 kan-na chhun 半包。
	In kā hiâ ê 住民叫做「烏道番仔」。因為 in 來 chiâ 了後破壞了烏道番仔 ê 田園，所以烏道番仔真怨恨 in ， in tī 山內 siōng 驚 ê 著是去tn̄g著烏道番仔，烏道番仔會用長鏢射人， koh 射了夭壽準，實在是足 khiàng ê 。後來啄鼻仔 kā 烏道番仔講 lia̍h 活 ê 會tàng 領三十箍 ê 美國錢。 無外久伊著 hông lia̍h 去，五、六個月了後， hông 送去hô͘-siú（和州，伊講是美國西太平洋 ê 一粒小島）。 hông lia̍h 去 ê lóng 關 tiàm hiâ ，台灣人一區、義大利一區、獨逸（德國）一區、日本一區、朝鮮(tiau-sián) 一區。
	我問伊對啄鼻仔 kah 日本仔 tó 一個 印象 khah 好？伊講是啄鼻仔， tih 替日本仔做代誌 ê 時陣，做無好tō phah ，啄鼻仔tō chiâⁿ 惜咱， bōe kā 咱 phah ，但是 hông 關 ê 時陣， mā 是足ǹg望日本派兵來救。日本仔 hit 區 pat 反過啄鼻仔，結果 hông thâi死千外 ê 。 Hit 陣 in 穿 ê 衫褲 lóng 是紅色 ê ，大概是按呢 khah hiàⁿ目， chiah khah 無法度逃走。衫褲是一間一間 khǹg ê ，一間 khǹg 衫，一間 khǹg 褲，一間 khǹg 帽仔按呢， beh 穿 ê 時陣，一間去hiàⁿ一領，真趣味。 hiâ ê 台灣人差不多有一千 個，五十 個 一堆， hō͘ 三個 啄鼻仔來管。伊講，台灣人 siōng 猴，真歹， pat 有人用做空khè ê iân-pit 將啄鼻仔 hám 落去， hám hō͘ 死。後來，每五十 個台灣人tō有五十個烏道番仔兵來管。
	Hit 陣若有做空khè ，主要是挽tho͘-má-tò͘，有工錢一kà銀， in hit 陣 khah 愛出去做空khè ，比關 tiâu tiâu khah 好。
	Iah未 hō͘ 啄鼻仔 lia̍h 著 ê 時陣，啄鼻仔有派奸細來，是日本仔，講伊 beh 轉去，若有 beh 寫批轉去 ê ，會使寄伊 the̍h 過去，真 chōe 人 lóng 寫，按呢啄鼻仔著知影有啥麼人tòa tī tó 位。
	Tī hiâ lóng 總做兩冬外，日本投降了後 koh 繼續做一段時間，後來 chiah 坐船轉來基隆，m̄-koh這是日本 ê 船， m̄ 是中國 ê 船。三十個人去， chhun 二十三個轉台灣。
	伊講 beh 調去南洋進前，坐船 beh 離開台灣 hit 時陣，有醫生 tih 做檢查，看有漏屎bô？若是有 tō 會使免去南洋， hit 陣真驚kho-joe-la（霍亂）。伊講 hit 陣若是知， kah 醫生串通一下，請伊開一個 證明， tō 會使免 hông 調去。
	我問伊離開卓蘭 ê 時陣，西坪（卓蘭 ê 一個 地名）是 m̄ 是已經有軍用機場？伊講 iah無。伊講啄鼻仔知影 in tòa tó 位， lóng 會 kā in 問口供，問 in 看知影有啥麼軍事設施 bô ？啄鼻仔 tō 有問伊西坪軍用機場 ê 代誌，伊 kā in 講確實是 m̄ 知，啄鼻仔 hō͘ 伊看 in 去 hip ê 地圖，用飛行機 hip ê ，日本仔有啥麼設施啄鼻仔 lóng chiâⁿ 清楚，實在有夠厲害。 伊 khah 早讀公學校 kan-na 讀一冬 tō 無 koh 再繼續讀落去， tī 厝 ê 種田，一直 kàu hông 調去南洋。 我 kā 伊講我真關心有關台灣歷史 ê 物件，特別趁這個 機會向你問起有關南洋戰爭 ê 代誌。伊講，若準 beh 講，幾lō工 mā 講 bōe soah 。伊講伊有一個 朋友 tòa 台南，千外 ê 去， kan-na chhun 伊一人轉來， in 小弟 mā 有去，小弟做隊長，後來伊ùi頂 kôan tàn 石頭 kā in 小弟 teh 死。故事足 chōe ê ，講亦講 bōe soah 。
	Kā伊說謝，十一點 thóng ，伊騎o͘-tó͘-bái離開。
3
	（日記。我做兵 ê 時 chiah 聽媽媽講起，四叔公 hit 陣 mā hông 調去海南島。退伍了後無幾工，我 tō 緊去 chhē 伊，1990年7月初9去 kàu in tau 。）
	四叔公 kā 我講，伊真歡喜有人來關心這 kóa 代誌。伊去海南島四冬， hit 陣根本無認為日本會戰敗，紀律 lóng 真好。Ta̍k 工暗頓食飽 tō 集合，一個 一個 kā你摃尻川，目的 tō 是 beh hō͘你保持緊張 ê 心， m̄-thang放鬆。若是出去 phah ， lóng 是少尉 chhōa 頭，兵仔 tī 後壁， bōe 講兵仔 phah 頭陣，軍官 tè 後壁。
	對兵仔 ê 照顧 mā 真好， hit pêng 落 ê 雨比咱 ê 這 pêng ê 西北雨khah 大陣， ak kah 歸身軀 lóng tâm 去，轉來了後隨 hō͘你換， bōe kā你刁。In hit pêng ê 風俗是結婚了後三工，新娘 tō 轉去外家，若有身，翁婿 chiah kā 伊 chhōa 轉來。八月十五（中秋） hit 工，不管有結婚無結婚 ê ， lóng 會使出來，無人會管， in 兵仔 kàu hit 工， lóng 穿台灣衫，出去亂。
	終戰了後， in 無船thang轉來，日本仔講，以後恁是中國人， m̄ 是日本人，恁 ê 代誌阮無愛管；寫批 kā 中國政府講， in ê 回覆是：台灣已經是中國 ê ，既然 lóng 是中國，恁 tī 海南島 phah 拚 mā 是 kāng款。兩 pêng lóng 無 beh chhap in 。
	結果是有一隻日本船歹去，送去越南修理，載 in 轉高雄（1947年年初）。身軀連半sián錢 mā 無， tō 用軍用罐頭 kah 老百姓換食 ê 物件， ùi 高雄勻勻仔行轉來台北。
	Kàu 台北 ê 時陣sán kah chhun 一支骨， m̄ 敢轉去厝 ê ，去阮阿公 hiâ ， hit 陣是半暝， peh 樓梯 peh kah siōng 後一層 ê 時已經 peh bōe 起li a ， tō hoah：阿忠（阮阿公）、嫂 a ，開門哦！ In 亦 m̄ 敢開，是人是鬼 lóng m̄ 知...... 四叔公講點外鐘，暗時十點左右離開，我講另工有機會， chiah koh 來一擺，將一 kóa 代誌問 khah 清楚 leh 。
	（後來伊無等我 koh 去 chhē 伊，tō破病、過身......）
4
	（清華海報牆頂面 ê 海報，1992年4月初9 kàu 4月16。）
	終 戰 e 賠 償
	福佬話讀寫班，這遍 beh 讀李雙澤 ê 遺作「終戰ê賠償」（台語版），是有關南洋戰爭 ê 故事。
	Tī 日本 ê 統治下，台灣人真 m̄ 甘願，投入了這場師出無名 ê 戰爭，不明不白，犧牲 chōe-chōe ê 性命。
	終戰了後，朝鮮真積極 tih 向日本政府爭取賠償，尾 a ， tī 1965年爭取著一人 350萬日幣 ê 賠償。台灣這方面， tī 日本 ê 台灣獨立運動人士 kah 一 kóa 台灣本島人民有 tih 走 chông ，但是，國民黨政權因為伊本身立場 ê 問題， soah 無啥願意替台灣人爭取這個 權益，一直延遲 kàu 80年代， chiah 得著一人200萬日幣 ê 賠償，何況日幣是愈來愈薄！
	咱真想 beh 問，敢講，這 tō 是台灣人 ê 運命？
	既然政府 m̄ 肯鬥saⁿ-kāng，有 ê 台灣人 tō 家己......
	李雙澤，民歌運動時期 ê 人物，外省人第二代，28歲時陣(1977.10) tī 淡水海邊，為著救人跳入海底，自按呢無 koh 再轉來......
	若有趣味，歡迎做伙來讀，拜二(14/4)暗時8:00台研社窩(仁102) 。
	台 灣 研 究 社 母 語組
	（這張用福佬話寫 ê 海報，每一字漢字頂 kôan lóng 有標羅馬字。另外 koh 有出一張北京語版 ê 。）
5
	政治環境 ê 錯亂，日本統治台灣，後來發動太平洋戰爭，徵召台灣人加入戰爭。1942年開始，「高砂義勇隊」、「陸軍特別志願兵」、「海軍特別志願兵」，一批一批 ê 台灣人 hō͘ 日本仔送去戰場。有 ê iah未 kàu 目的地，船 tō hō͘ 盟軍 ê 飛行機炸沉去；有 ê 戰死、 iau 死、病死。In效忠日本天皇，為著「大東亞共榮圈」 ê 號召khong-khong仔獻出家己 ê 青春kah性命。二十外萬台灣人投入這場莫名奇妙 ê 戰爭，三萬外人死去。
	日本投降，戰爭已經結束......
	政治環境 ê 錯亂，kho͘面桶來 kàu 台灣，原來ê台灣人日本兵 hō͘ 所有 ê 人放 sat 。日本政府無 beh chhap ，因為 in 已經 m̄ 是日本國 ê 人民；kho͘面桶政權 tìⁿ m̄ 知，因為 hit 時陣中國 kah 日本是交戰國， in soah kah 日本人 khiā tiàm 仝一線， beh 哪會使替 in 爭取權益？若 beh 照顧， mā 愛照顧 hit kóa tè 阮 ùi 中國走路來台灣 ê 老芋仔。
	戰爭是無情 ê ，不管是對死去、 iah是活落來 ê 人來講。
	當事者一個一個倒落去，台灣 ê 政治環境繼續錯亂......
6
	Tī 市面上，會tàng chhē 著一 kóa 華文作品，是 tih 描寫台灣人 ê 南洋戰爭經驗，可比李喬 ê 「寒夜三部曲(三)孤燈」，陳千武 ê 「獵女犯」，李雙澤 ê 「終戰ê賠償」，宋澤萊 ê 「最後一場戰爭」，吳平城 ê 「軍醫日記」，胡台麗 ê 「一段被人遺忘的歷史」……等等。這 kóa 作品，有 ê 是作者親身 ê 經驗，有 ê 是作者 ê 親人 ê 經驗， mā 有聽人講了後整理落來 ê 。
	日本人發動戰爭，終戰後， in khah 有 tih 反省這場戰爭，做了真 chōe ê 資料整理 kah 思考。比較起來，咱 ê 華文作品，並無對南洋戰爭做一個 全面的、系統的 ê 整理。 有一條真好聽 ê 台語歌謠「望你早歸」， tō 是 tih 寫終戰了後， hông 送去南洋相戰 ê 台灣人一批一批仔轉來，m̄-koh家己 ê 後生、翁婿 soah 無 tī 內底， in 只有 tī 基隆、高雄 ê 港口tiām-tiām仔等待，等待伊 ê 後生、翁婿會tàng 出現在伊面頭前。
	黑澤明導演 ê 電影「夢」，其中第三個夢，已經戰死 ê 士兵 ùi 磅空內底行出來， kā 隊長講 in 老母 iah-koh tī 厝內等伊， hō͘ 我印象chiâⁿ深，無法度放 bōe 記。
	最近，透過朋友相報， tī 鴻儒堂買著幾本描寫南洋戰爭 ê 書，大部分 lóng 是參與戰爭 ê 台灣人所寫 ê ，m̄-koh lóng 用日文。我想， in 轉來台灣了後無機會 koh 受華文 ê 教育（ mā 有可能是無願意受華文 ê 教育）。 Tī 台灣，看 pat 日文 ê 人畢竟有限， in ê 作品 khah 無法度引起 ta̍k 家 ê 注意。
7
	南洋戰爭， 帶走chōe-chōe台灣人ê性命，包括我一個阿伯。南洋戰爭， mā 拆散 chōe-chōe 原本幸福美滿 ê 台灣人家庭。
	雖然教育無 kā 咱教，我對台灣史有趣味，是按接觸二二八 ê 歷史開始，後來 chiah 注意著南洋戰爭。 Hō͘ 我有一個 感想：對台灣人來講，這兩件代誌 lóng 是一場惡夢， m̄-koh，伊確確實實是台灣近現代真豐富、真精彩 ê 一段歷史。 Khah 早 tī 戒嚴時期kho͘面桶 ê 統治之下，研究台灣史 iah-koh 是一個 禁忌，何況是這兩件代誌。
	後來，政治環境慢慢 tih 改變， khiā tī 反對kho͘面桶 ê 立場來講，二二八事件是一個 真理想 ê 政治訴求，開始有一陣人向禁忌挑戰， hō͘ 二二八得著平反。
	Kah二二八比起來，南洋戰爭tō khah 無法度得著 ta̍k 家 ê 注意，雖然，為著南洋戰爭付出性命 ê 台灣人無比二二八 khah 少，雖然，伊 mā 是台灣 ê 歷史。
	M̄-nā是南洋戰爭，對真 chōe 台灣 ê 歷史，咱 lóng 有需要 koh 再重認識， koh 再重探討、重思考。
	假使有一工，台灣順利建國， m̄-koh hit 時陣 ê 台灣人， lóng 已經將台灣原來 ê 語言、文化、歷史放 bōe 記 a ， 按呢，咱是 beh 按怎？