最近修改日期： 2008年5月29號下晡時      最近閱讀日期：2008年11月21號下晡時      Iûⁿ Ún-giân 楊允言
羅馬字部分iah未完成，若beh鬥saⁿ-kāng請聯絡管理者

0. Āu-soaⁿ Pîⁿ-po͘ 後山平埔
	若講著後山，你會去想著 siáⁿ-mé ？台灣 siōng súi ê 所在？但是水泥廠對北 pêng 來，漸漸將伊 ê 面chhiuⁿ ó͘ kah 一空一空 lóng 是傷痕；台灣最後一片樂園？ M̄-koh 財團早 tō 開始 tī chia 炒地皮，péng 幾 lō péng ，新南橫公路想 beh thàng 過大武山生態保護區直接kàu 台東......
	交通 ê 無利便， hō͘ 伊無親像 beh 死 tōng-hāiⁿ ê 台灣西部hiah-nī 凄慘落魄，雖然資本家 hit 支烏手，iuⁿ-ā siàu想 beh 將chit teh 土地拆食落腹。
	An-nē 講來，無的確後山 ê 存在，伊最大 ê 意義， tō 是 hō͘ 平埔族一個走閃 ê 空間， tī 漢人不斷入侵以及統治者壓迫 ê 情形下， hō͘ in 族群 ê 性命會tàng 延續落來。
	已經有一 kóa 族群 tiàm 台灣 chit 塊土地頂面消失去 a ， 若是險險 beh 滅種 ê 繼續滅絕，對咱、對台灣、對世界來講是 m̄ 是真遺憾 ？
	「平埔族」並 m̄ 是現在政治體制所認定 ê 族群稱呼， an-nē ，咱對伊 ê 理解是 siáⁿ-mé ？咱知影清朝時陣， in 將原住民分做「生番」 kah 「熟番」，「生番」 tō 是目前所講 ê 原住民、「山地人」，tng當時 iah未歸化，以 phah 獵、遊耕為主；「熟番」 tō 是咱 chit-má 講 ê 平埔族，以農耕為主， tòa tī 平埔。 An-nē ê 分類，對西部無 siáⁿ-mé 疑問， 但是對後山來講 tō 重tâⁿ 去 a ，親像阿美族、卑南族 mā 是 tòa tī 平埔，soah hō͘ in 當做是「生番」，ùi chia ，咱 mā 會tàng 知影，清朝時陣對後山 ê 種種實在是 sa 無cháng。
	漢人移民來 kàu 台灣，需要土地來種作，所以先接觸著 ê ， tō 是平埔族。頭前是漢人、後壁是「生番」，前無步後無路，土地 hông 搶去了後，無thang生活，只 chhun 逃亡 kah 同化兩條路。歷史上，平埔族有幾遍毀社遷移ê 記錄，ùi 中部 kàu 埔里、ùi 台南 se̍h 過恆春 kàu 台東、ùi 台南盤過中央山脈 kàu 台東、ùi 埔里盤過山 kàu 宜蘭、ùi 宜蘭行海路 kàu後山......
	這 lóng 是歷史，歷史是過去 ê 代誌。清朝時陣，有土牛線將漢人 kah 平埔族分開；日本時代，戶口資料 koh 會tàng 看出平埔族 ê 存在，chit-má siáⁿ-mé lóng 無 a 。真 chōe 人相信，既然無經過大規模ê 屠殺，所以平埔族一定 hō͘ 漢人同化去， in ê 語言 mā 已經消失，留落來 ê chhun 一寡地名，羅東、艋舺、大屯、干豆、暖暖、奇哩岸、焦吧哖......
	會 hông 同化，應該是現實 ê 壓力，但是 khah 重要 ê 因素可能是:文化自卑感。因為對家己文化 ê 自卑，認為家己是 khah 低階層 ê 人，致使 in m̄ 願意承認 in 家己是平埔族； 若無， 是按怎日本時代 ê 戶口資料全庄登記是平埔族， chit-má 一下去看， in soah lóng 變做是福佬人、客人 ？
	走chhē in 雖然那像海底摸針 chiah-nī 困難，有心研究台灣歷史ê 朋友， iuⁿ-ā 開始 chhē 著 hit-kóa iah-koh 活 tī 世間 ê 平埔人。
	Koh 因為後山，地形 ê 阻礙，漢人侵入 ê 速度真慢，無形中，提供平埔人一個生存 ê 空間。
	咱 tī 後山發現著，平埔族其中一族， Kavalan ， in ê 語言並無死去， tī 台灣 ê 後山，花蓮、台東地， iah koh 有人 teh 使用Kavalan 話。
1. Āu-soaⁿ Kavalan 後山 Kavalan
	咱 beh 來講 Kavalan 。
	Kavalan 自早是對 tó 位來 ê ，無的確學者之間 koh 會有一-kóa爭論，會tàng 知影 ê 是， in tī 漢人大量出現 tī 台灣進前， tō 世世代代tòa tiàm 三面是山一面 óa 海 ê 蘭陽平原，日子過了平靜仔平靜。 In 建立三十六社，若是以濁水溪(蘭陽溪)做界線，溪北是西勢二十社，溪南是東勢十六社。
	1796年，吳沙 chhōa 一陣漢人來 chia 開墾， Kavalan 人 ê 惡夢chiah tú tú 開始。一方面，漢人有文化優越感，看 in bōe 起；另外一方面，利用硬搶、土地買賣， iah 是 in 迷信 ê 弱點，運用一 kóa 奸巧 ê步數，漸漸取得 in ê 土地， hō͘ in 無法度生存，一步一步退去南 pêng 山邊，但是 chit-個時陣 koh 愛煩惱後壁山Tayal出草 ê 性命威脅。
	最後， in 只好離開故鄉另外求發展。留 tiàm 宜蘭 ê ，漸漸 hō͘ 漢人同化， mā 將家己 ê 語言放 bōe記去。
	頂chām仔，我 tī 宜蘭看過自稱正種 ê Kavalan 流流仔社陳秋香老先生，伊七十外歲，用福佬話唱七字仔，唱 in 祖公仔代，歌詞內底講著 in是「 gōng 番」、 in 是「下九流」等等 chit kóa 漢人歧視 in 所留落來 ê 印記，聽起來總是感覺心酸酸。
	離開家園坐船來後山( mā 有部分是行山路過來 ê )，運命 mā 無teh外好。後山會tàng 種作 ê 土地無 chōe ， koh 是 khah òaⁿ 來ê 移民，為著生存問題， kah 原來 ê 住民相衝突是無thang避免 ê 代誌；1879(光緒四年)發生加禮宛事件，真無簡單來 kàu 後山建立新家園 ê Kavalan 人， koh 再遭受大大 ê 打擊， 因為清朝驚 in koh 會起來作亂，將 in ê 社群拆散， 發配去無kâng ê 所在， hō͘ in bōe-tàng tòa做伙。
	但是，來 kàu 後山 ê Kavalan 人，將 in ê 話語留落來，是咱目前所知，唯一將家己語言留落來 ê 平埔族。
	按怎 chhē 著 Kavalan 人 ？ In ê 習慣， 會 tī in tòa ê 所在種杆(kán)仔樹 ， in 稱呼做 ka-sú ， 雖然有杆仔樹 ê 所在 chit-má 無一定 iah-koh 有 Kavalan 人 tòa tī hia，總是加減hō͘ 咱有一個參考 ê 機會。
	透過參加營隊，我有機會接觸後山 ê Kavalan ， hit kóa iah koh 有才調使用 Kavalan 話 ê Kavalan 人。了解 ê 物件真粗淺，總是提出來bóng 做參考，無的確會tàng 刺激 ta̍k家做進一步 ê 思考。
	咱 beh 來講後山 ê Kavalan 。
2. Pak-po͘ Ka-lé-óan 北埔加禮宛
	「加禮宛」其實 tō 是 Kavalan ，為 siáⁿ-mé 有「加禮宛」 chit 個稱呼，可能是因為 in 來 kàu 後山了後，想 beh 將原來 ê 稱呼暗khàm 起來，所以改名，用原來三十六社其中一社 ê 社名「加禮宛社」來稱呼 in 家己。
	花蓮市北 pêng 有一個所在叫做「加禮宛」，是 Kavalan 人 ùi 宜蘭走路來後山 ê 第一個根據地。
	根據頭目江加走先生 ê 講法， tú 來 ê 時陣，主要是 kah A-mí-á [阿美族] tòa 做伙， in mā pat kah a-mí-á 相 thâi ； 另外， in koh會受著高山仔[Taloko，太魯閣族]出草 ê 威脅。以前 in tī 宜蘭起厝ê 時陣，本來 lóng 是用菅榛做材料，來 kàu 加禮宛了後， koh 加利用塗kat來起厝，主要原因tō是驚高山仔半暝出草，刀仔會直接 thàng 過菅榛tu̍h 入來。
	我特別 kā 伊問一 kóa 稱呼 ê 問題，高山仔叫 in Pài-s， in 稱呼福佬人 mu-sú-s，叫客人ka-súi。
3. Sin-siā 新社
	花東海岸線，豐濱鄉新社村是目前 Kavalan 人 siōng chōe ê 所在，大部分是 ùi 北埔加禮宛來 ê ， mā 有一部分是日本時代直接 ùi 宜蘭過來 ê ， 因為人 chōe ， 好做研究， tī 終戰後， pat 有台灣、日本 ê 學者來 chia 做 khah 大規模 ê 調查研究。
	In ê 老歲仔用 Kavalan 話 teh 交談，三不五時仔 mā 會tàng tī in對話內底聽著一 kóa 日本話。
	Chiâ 本來 ê 住民是 A-mí-á， Kavalan 來 chiâ 了後， kah A-mí-á 通婚 ê 情形真普遍，受A-mí-á 文化 ê 影響 mā 不止仔深， chiâ 無高山仔會來出草， khah 無性命 ê 威脅。
	In ê 語言能力普遍 lóng bōe bái ，年歲 khah 大 hit iân， 不管是 Kavalan 話、福佬話、日本話、A-mí-á 話，大概 lóng 會曉講，換另外一個角度來看，其實這亦是弱勢族群 khah 悲哀 ê 所在，無的確咱 mā kan-na會sái 用 khah 樂觀 ê 態度來面對 chit 個事實 ：語言能力是in ê 資產。
	其實，對真 chōe 老歲仔來講， in tiàm chiâ 出世， mā 無去外地發展，無啥有 kah 漢人接觸 ê 機會， tō 算會曉講福佬話， mā 應該 bōe 講 kah chiah-nī 溜lia̍h ；但是 in 福佬話確實講了 súi 氣，這是我感覺真有趣味 ê 一個問題，尤其 in 保留真純 ê 宜蘭腔。經過探問，原來是 in 自細漢 tī 厝內，老父老母 tō 有 teh 講福佬話。所以， an- nē 應該是 iah koh tī 宜蘭 ê 時陣， tō 開始使用福佬話，一直傳落來。
	根據蔡阿升老先生 ê 講法， chiâ ê Kavalan 人分做兩種，一種是Kavalan ，一種是To̍k-bú-óan ， 話無啥 kāng-款。伊特別講是To̍k-bú-óan ， koh 講這 m̄ 是腔口 ê 差別，是親像咱台灣布袋戲分做西皮 kah 福氣祿兩派 kāng款，話互相會通，但是一 kóa 話詞無仝，可比刀仔， Kavalan 講 sa-ge̍k ，To̍k-bú-óan 講 na-ba̍t ， koh 親像火， Kavalan 講 ha-mán ，To̍k-bú-óan 講 ja-ma̍k 。
	伊 an-nē 一講，講kah hō͘ 我霧 sà sà ， sa歸晡sa lóng 無。後來經過討論 kah chhē 資料， chiah 知影 To̍k-bú-óan koh 叫做 To-ló-bí-óan (多羅美宛)，是Ketakelang 族 ê 一個亞系， 真早以前 tō ùi 北部 sóa 來宜蘭， kah Kavalan tòa 做伙。
	若照 an-nē 講，蔡阿升無算是 Kavalan 人。總是，族群認同 chit 個問題，有時仔真微妙， 放棄 Kavalan chit 個身份認同 ê 機會， 伊 tō 已經無歸屬感 a 。
	In 稱呼福佬人 mu-sú-s， 叫客人 pā-gin， 阿美人是 ki-jai- iá。 tī 新社， Kavalan 人 tòa 一 pêng ，阿美人 tòa 另外一 pêng ；除了海邊仔有幾 ê 老芋仔，無 siáⁿ-mé 漢人。
	Tī 新社 ê 時陣， 真 tú-好有參加著 in ê 豐年祭，因為歷史 ê 無情， 致使in ê 真 chōe 物件， 包括穿chhah、歌曲……等等 lóng 有Amis 化 ê 情形； in mā 已經無清楚原來祖先 ê 服裝， 是一陣好心 ê研究者根據以前文獻 ê 資料，替in 設計出 in 以前可能是按怎穿， in tō 照這 kóa 學者 ê 建議來做衫。 Ùi chia，咱會tàng 看著Kavalan 人tī chia 所 tú-著 ê 矛盾。
	因為人 chōe ， tī 未來這段時間 Kavalan 人 ê 自覺運動， 新社會佔真重要 ê 地位。
4. Li̍p-tek 立德
	新社以南，一直 kàu 台東長濱 ê 三塊厝(三間屋)， Kavalan ê 分佈 tō lân-lân-san-san，並無形成一個 khah 完整 ê 社區。
	豐濱 ê 立德村有一個 Kavalan 家族， tī hia kah in 開講 ê 時陣，mā 順sòa kā in 學一、兩句仔 Kavalan 話。「小姐真 súi 」是o-va2-táng su-ní-s ò ta-jú-ngán ，「小姐我 kah 意你」是ta-jú-ngán ngi̍t-ngan-kú ai-í-siú。 chit kóa 話愛 bóng 學， iú-bì 起來， 另工若交著 Kavalan ê súi 姑娘， chit 個時陣， 無的確Kavalan 話 kā 展兩句仔， 真緊 tō 好勢好勢。
	立德村有 Amis、福佬人、客人 kah 中國仔，主要 iah 是以 Amis kah Kavalan 為主。我小 kā 聽一下，發現 in 講 ê 福佬人內底，宜蘭腔 ê成份無 chōe ，我kan-na聽著tún--lâi [轉來] niā， 其它 ê ，親像tńg--khì [轉去]， chia̍h-pn̄g [食飯]， hip- siōng [翕相] lóng 已經無宜蘭腔 a 。
	In mā 叫福佬人 mu-sú-s，叫阿美人Amis，但是稱呼客人pa-hián 。
5. Chio̍h-thui 石梯
	Koh 落南，豐濱 ê 石梯村有一個漁港，目前知影 chiâ kan-na有一戶Kavalan 人，胡當仔金老先生今年 69 歲，討海人，伊有四隻竹pâi仔，因為in 後生 mā tè 伊 teh 討海。伊叫Amis 「番仔」， in某 tō 是 Amis，名叫做「烏番」。
	我 koh 順sòa kā 伊學著幾個 Kavalan 話詞， kah 伊 khah 有關係 ê ，飽流[漲潮]是ba-ka-na̍p ， hiàⁿ 流[退潮]是 mo-tèk-ò 。其實我 koh khah 有趣味 ê 是伊福佬話 ê 腔口， kah 立德 ê 情形無仝，伊保留真chōe 宜蘭腔 ： túiⁿ--khì [轉去]、 tún--lâi [轉來]、 Cheng-gôan [樟原]、 chhut-mûi [出門]、 sìn-giáng [信仰]、 ta̍k-kè-go̍eh [ta̍k 個月]……等等。
	是按怎我會感覺趣味？ 因為伊是討海人， lóng 是家己一個人坐竹pâi仔出海，相對來講，伊 kah 人交談 ê 機會加真少，所以伊 ê 福佬話可能完全是 ùi 厝 ê 學來 ê ， 而且是 ùi 宜蘭chah來 ê 。
	伊叫福佬人 mu-sú-s， 叫 Amis mā 是 Amis，但是伊 m̄ 知影客人愛按怎講。
6. Tân Chhiu-hiang lāu sian-siⁿ chhiùⁿ--ê 陳秋香老先生唱 ê
Chia khai-sí góa boeh lâi liām sì-kù a Chia boeh kóng góan Kavalan ê kò͘-sū o͘ Góan Kavalan chū kó͘-chá li chiū bô le̍k-sú li Pí-kàu hàn-jîn tō ū khah su	Chia開始我boeh來唸四句a Chia boeh講阮Kavalan ê 故事o͘ 阮Kavalan自古早li就無歷史li 比較漢人 tō 有 khah 輸
Hàn-lâng khah tōa-cho̍k jî-chhiáⁿ khah iu-siù Góan Kavalan ê sè-cho̍k sī hā-kiú-liû Góan to chhōe bô le̍k-sú thang kin-kiù Múi-ji̍t-á góan sim-koaⁿ mā chin iu-chhiû	漢人 khah 大族 而且 khah 優秀 阮Kavalan ê 細族是下九流 阮to chhōe 無歷史thang根究 每日仔阮心肝 mā 真憂愁
Boeh kóng kó͘-chá ê sî-tāi Góan ê chó͘-sian m̄-chai tó-ūi lâi o͘ Le̍k-sú góa ia̍h bô liáu-kái Góan a-kong mā kóng i m̄-chai	Boeh 講古早 ê 時代 阮 ê 祖先 m̄ 知 tó 位來 o͘ 歷史我亦無了解 阮阿公 mā 講伊 m̄ 知
Kó͘-chá góan ê chó͘-sian kòe-lâi Tâi-ôan Chiū-sī lâi tòa tī-teh Gî-lân-kōan Chit-kóa ê kiáⁿ-sun thôan-hā Lân-iâng ê pêng-gôan Hit-chūn lán Gî-lân chôan sī góan chit-cho̍k pêⁿ-po͘ hoan	古早阮 ê 祖先過來台灣 就是來 tòa tī-teh 宜蘭縣 Chit-kóa ê kiáⁿ 孫 傳下蘭陽 ê 平原 Hit陣咱宜蘭全是阮chit族平埔番
Gô͘-sa bōe lâi ê sî-chūn Hit-chūn Lân-iâng chôan sī góan chia pêⁿ-po͘ ê kiáⁿ-sun Liáu-āu i Gô͘-sa chiah lâi khai-khún Tō-sī Chheng-tiâu ê sî-chūn	吳沙未來 ê 時陣 Hit陣蘭陽全是阮 chia 平埔 ê kiáⁿ 孫 了後伊吳沙 chiah 來開墾 Tō 是清朝 ê 時陣
Gô͘-sa lâi tī cha̍p-nî āu Hit-chūn góan ê a-chó͘ chiah ē chhut-leh-thâu Gô͘-sa tih khai-khún i to iah-bōe kàu Tāi-seng khai-káng chò chúi-kau	吳沙來 tī 十年後 Hit-陣阮 ê 阿祖 chiah 會出leh頭 吳沙 tih 開墾伊to iah未 kàu 代先開港做水溝
Gô͘-sa i sī Tn̂g-soaⁿ-lâng Nā boeh lâi hô-hoan tō-sī siūⁿ-khang kah siūⁿ-phāng Góan ū chi̍t-kóa cháu kòe Hoe-lian-káng Ū-lâng poaⁿ khì khah hūiⁿ khì-kàu Tâi-tang	吳沙伊是長山人 若 boeh 來和番 tō 是想空 kah 想縫 阮有一kóa 走過花蓮港 有人搬去 khah 遠去 kàu 台東
Kóng kah in hàn-jîn-lâng sī chin khó͘-ò͘ⁿ li Choan-mûi boeh khi-hū góan chit-lō gōng pêⁿ-po͘ Liáu-āu góan ê seng-o̍ah jú lâi soah jú kan-khó͘ Poaⁿ kòe Hoe-lian koh-chài khai-khún chiah khah ū chiân-tô͘	講 kah in 漢人人是真可惡li 專門 boeh 欺負阮 chit-lō gōng 平埔 了後阮ê生活愈來 soah 愈艱苦 搬過花蓮 koh 再開墾 chiah khah 有前途
Kóng kah i Gô͘-sa tō-sī Gô͘-sa In lâi chhōa chi̍t-tīn chôan sī lô-hàn-kha Lâi-kàu che Gî-lân to̍h boeh kah góan lâi khí-sio-phah Hàn-lâng lióng-cho̍k sī chôan bē-ha̍h	講 kah 伊吳沙 tō 是吳沙 In 來 chhōa 一陣全是羅漢跤 來 kàu 這宜蘭 tō boeh kah 阮來起相phah 漢人兩族是全 bē 合
Gô͘-sa i e bú-gē sī bē hâm-bān Tō-sī Gô͘-sa siāng chá kòe-lâi kàu Gî-lân In lâi chôan sī chhōa hit-lō to̍k-sin-hàn Hàn-jîn-lâng ê sim-koaⁿ sī chin iá-bân	吳沙伊 ê 武藝是 bē hâm慢 Tō 是吳沙 siōng 早過來 kàu 宜蘭 In 來全是 chhōa hit-lō 獨身漢 漢人人 ê 心肝是真野蠻
Hàn-jîn-lâng tùi góan mā bô hó Khòaⁿ góan chit-lō pêⁿ-po͘-á sī khòaⁿ chin bô a Bû-só͘-put-chì lōan-lōan chò Chòe-lâng chin bē tit jîn-hô	漢人人對阮 mā 無好 看阮 chit-lō 平埔仔是看真無a 無所不至亂亂做 做人真 bē 得人和
Góan chit-lō pêⁿ-po͘ à liâng-siān iū kó͘-ì Bô boeh chun-tiōng Gô͘-sa Hit-nî Gô͘-sa soah lâi kòe-sì li Soah tō pàng-bó͘-pàng-kiáⁿ kám-kak pàng bē sūn	阮 chit-lō 平埔仔良善又古意 無 boeh 尊重吳沙 Hit 年吳沙 soah 來過世li Soah 著放某放 kiáⁿ 感覺放 bē 順
Chū-chiông Gô͘-sa sí liáu-āu Hàn-lâng liáng-cho̍k lōan-chau-chau Sì-kè cháu-khì thoa sí-káu Thoa-thoa kui-tui lâi khǹg chāi góan ê chhân-thâu	自從吳沙死了後 漢人兩族亂糟糟 四kè 走去拖死狗 拖拖歸堆來 khǹg 在阮 ê 田頭
Kóng kah kó͘-chá ê pêⁿ-po͘-á khah gōng-tai Hàn-lâng tùi góan chin lōan-lâi Cháu-khì góan ê chhân-thâu kā góan thau pàng-sái An-nē góan-kong--a liân chhân to bô-ài	講 kah 古早 ê 平埔仔 khah gōng 呆 漢人對阮真亂來 走去阮 ê 田頭 kā 阮偷放屎 An-nē 阮公a連田to無愛
Lo̍h--lâi góa boeh koh lâi kóng lo Chit-má boeh kóng góan lāu-pē in ê a-kong Lâng nā ū pēⁿ ē-hiáu kā-lâng chhòng Góan a-chó͘ tùi pēⁿ-lí sī chin lêng-thong	落來我 boeh koh 來講lo Chit-má boeh 講阮老父 in ê 阿公 人若有病會曉 kā 人創 阮阿祖對病理是真靈通
Góa ê a-chó͘ sī chin pún-téng li Tùi che pēⁿ-lí kóng--khì-lâi sī chin bān-lêng Chheⁿ-chháu-á ē chò io̍h-á lo sī chin hó-iāng Ká-nā hóe-tōa chhòng chit-lō lô͘-hōe hō͘-lâng chia̍h thè-liâng	我 ê 阿祖是真本頂li 對這病理講起來是真萬能 青草仔會做葯仔lo是真好用 Ká若火大創 chit-lō 蘆薈 hō͘ 人食退涼
Lô͘-hōe choan-bûn tī thè-hóe Tō koh lo̍h hit-lō chi̍t-bī hit-lō pe̍h-kiok-hoe Chi̍t-kòe nā bô hó tio̍h-ài chia̍h nn̄g-kòe Cho̍at-tùi ē hó sī bô būn-tôe	蘆薈專門治退火 Tō koh 落 hit-lō 一味 hit-lō 白菊花 一 kòe 若無好 tō 愛食兩kòe 絕對會好是無問題
Lâng nā phòa-pēⁿ ū chèng-thâu Tō chhōe góan a-chó͘ lâi góan-tau Góan a-chó͘ io̍h-á chôan sī iōng chheⁿ-chháu Nā lâi koh the̍h io̍h-á tō ū âng-pau	人若破病有症頭 Tō chhōe 阮阿祖來阮tau 阮阿祖葯仔全是用青草 若來 koh the̍h 葯仔 tō 有紅包
Góan ê a-chó͘ i sī chin kó͘-ì Hōan-chiá ta̍k-ê mā chun-tiōng i Chèng-thâu nā chhòng hó li tio̍h chin hoaⁿ-hí Chit-má âng-pau pau tio̍h to̍h chin-chē chîⁿ	阮 ê 阿祖伊是真古意 患者 ta̍k 個 mā 尊重伊 症頭若創好li tō 真歡喜 Chit-má 紅包包著 tō 真 chē 錢
Lo̍h--lâi boeh kóng gún lāu-chó͘ Chîⁿ thàn chin-chē ē kan-khó͘ Lo̍h--lâi tō boeh kóng góan lāu-chó͘ Chhú-khì tō khah bô chiân-tô͘	落來 boeh 講阮老祖 錢 thàn 真 chē 會艱苦 落來 tō boeh 講阮老祖 此去 tō khah 無前途
Chîⁿ thàn siuⁿ-chē lí tō ke kan-khó͘ Chi̍t-kóa thó͘-húi-á tō boeh lâi chhiúⁿ khò͘-khò͘ Kóng kah thó͘-húi-á tō-sī thó͘-húi-á Nā boeh lâi chhiúⁿ-chîⁿ i̍t-ti̍t chhui	錢 thàn siuⁿ chē 你 tō 加艱苦 一kóa 土匪仔 tō boeh 來搶 khò͘-khò͘ 講 kah 土匪仔 tō 是土匪仔 若 boeh 來搶錢一直摧
......	......
Chin-chiàⁿ bô thian-liâng Góa ê a-chó͘ khì hō͘ thó͘-húi-á kā i phah chiâⁿ thiàⁿ Boeh kah i phah mā phah bē iâⁿ Lāi-bīn nā ū-chîⁿ tō-ài chôan-pō͘ piàⁿ Chîⁿ hō͘ i chhiúⁿ liáu chiah kam-gōan kiâⁿ	真正無天良 我 ê 阿祖去 hō͘ 土匪仔 kā 伊 phah chiâⁿ 疼 Boeh kah 伊 phah mā phah bōe 嬴 內面若有錢 tō 愛全部拚 錢 hō͘ 伊搶了 chiah 甘願行
Góa ê a-chó͘ pī hia-ê thó͘-húi phah li Lāi-bīn kā góan chhiúⁿ kah ta-ta-ta Bô-chîⁿ saⁿ-tùiⁿ soah tō͘ bē pá Chit-má to̍h poaⁿ lâi Ta-khe chit-ê pêⁿ-chio̍h-kha	我 ê 阿祖被 hia-ê 土匪 phah li 內面 kā 阮搶 kah ta-ta-ta 無錢三頓 soah 度 bōe 飽 Chit-má tō 搬來礁溪 chit-ê 平石跤
Pún-lâi góan sī tòa tī Tōa-tek-ûi Hō͘ thó͘-húi-á chhiúⁿ kah chin chia̍h-khui Saⁿ-kang-nn̄g-kang tō chhut thó͘-húi Put-tit-í chiah tō poaⁿ sóa-ūi	本來阮是 tòa tī 大竹圍 Hō͘ 土匪仔搶 kah 真食虧 三工兩工 tō 出土匪 不得已 chiah tō 搬 sóa 位
Tē-it lô-lo̍k góan lāu-chó͘ Khì hō͘ thó͘-húi-á pek kah cháu bô lō͘ Taⁿ bô-chîⁿ koh saⁿ-tùiⁿ soah tō͘ bē pá Chhùi-ta bô-chîⁿ thang han-ka(?)	第一勞碌阮老祖 去 hō͘ 土匪仔逼 kah 走無路 Taⁿ 無錢 koh 三頓 soah 度 bōe 飽 喙ta無錢thang通 han-ka
Thó͘-húi-á tē-it tio̍h siōng mî-chiⁿ Nā lâi tō-sī boeh chhiúⁿ chîⁿ Lāi-bīn kā góan chhiúⁿ kah tui-chhun-thi Chiah poaⁿ-lâi Ta-khe tòa-tī soaⁿ āu-piⁿ	土匪仔第一 tō siōng 綿精 若來 tō 是 boeh 搶錢 內面 kā 阮搶kah tui-chhun-thi Chiah 搬來礁溪 tòa tī 山後邊
......	......
	ps： 這是 tòa tī 宜蘭 ê 陳秋香老先生所唱 ê ，陳老先生是 Kavalan流流仔社，已經 bōe 曉講 Kavalan 話。是有一擺參加新文化營隊，伊唱hō͘ 阮聽 ê ， 我 ê 朋友為文 kā 錄音起來，我借錄音帶來， 將內容整理出來。伊講 ê 是宜蘭腔， kah 我 ê 無 kāng款，我照伊 ê 腔口記，另外，因為錄音帶換面，有淡薄仔內容無法度記落來。
7. Góa ê kám-siū 我 ê 感受
	就目前已經有發現 Kavalan 跤跡 ê 所在，因為時間 ê 關係，並無lóng-總 kā se̍h 一遍，著算是有去過 ê 所在， mā 無講 kah 所有 ê Kavalan 朋友開講、講過話，所以若是以我 ê 所知， beh 愛提出一 kóa想法 kah 感想，可能 bōe 周至，破綻真 chōe ，總是，經過幾工來 ê 接觸，心內有一kóa 衝擊。
	會記 ê 有一擺聽講演，有關族群關係 ê ，講演者講著原住民內底有一族，叫福佬人pāi-láng ，稱呼客人 ngái-ngai； pāi-láng 是siáⁿ-mé 你 kám 知 ？ tō 是 ùi 福佬話「歹人」過去 ê ， 用咱 ê 話kā 咱罵轉來，學了算出師 a ；ngái-ngai， 可能是因為客人講話 ê 時，不時 teh ngai[我]來ngai去，歸氣叫 in ngái-ngai。看 in 按怎稱呼別ê 族群，其實 mā 加減會tàng ùi 其中了解 in 對別族群 ê 價值判斷， in ê 立場 ê 價值判斷。
	以 Kavalan 來講， in 叫福佬人 mu-sú-s，我 pat 問 in ms-sú-s tī Kavalan 話內底是 siáⁿ-mé 意思 ， 總是我無得著解答； 若講著 in 對客人 ê 稱呼， 彼 tō koh khah 花kô-kô a ， ka-súi 、 pā-gin、pa-hén ，每一個所在講法 lóng 無仝，甚至 tòa 石梯 ê 胡老先生 m̄ 知愛按怎講。可能，因為原底 in iah koh tī 宜蘭 ê 時陣， in tō khah 無 kah 客人接觸，所以無一個統一 ê 稱呼。當然這只是推測，到底是 siáⁿ 原因， tō 留 hō͘ 人類學者去煩惱。
	花蓮、台東，以漢人 ê 立場來講，基本上是一個移民區，無仝腔口 ê 福佬話假使 tī chit 個所在透濫，有可能會漸漸發展出一個 hō͘ 人感覺 khah 無腔 ê 腔口，照洪惟仁老師 ê 講法，這叫做「優勢腔」。花蓮 Kavalan 人講 ê 福佬話若是有保存 khah chōe ê 宜蘭腔，會tàng 說明兩件代誌：第一， in 來 chia 了後， khah 無 koh 出外，亦 khah 無 hâm 移民來chia ê 福佬人接觸； 第二是， in 原底 tī 宜蘭 tō 受著真深 ê 福佬化，福佬話已經成做 in ê 母語之一，不管這是 m̄ 是悲哀，總是一個事實。
	另外， in 借用漢人 ê 價值觀， mā 將 Amis 當做番仔， chit 點會tàng 看出 in ê 困境，夾 tī 漢人 kah 「生番」中央，「熟番」是人 iah 是「番」？ 這 hō͘ 我想起熟番歌內底所寫 ê ：
Jîn ùi seng-hoan béng jû hó͘ ， Jîn khi se̍k-hoan chiān jû thó͘ ； Kiông-chiá ùi chi jio̍k-chiá khi， Bû nái jîn-sim thài put kó͘ !	人畏生番猛如虎， 人欺熟番賤如土； 強者畏之弱者欺， 無乃人心太不古!
Se̍k-hoan kui-hòa khûn kiong keng， Soaⁿ-chhân chi̍t-kah Tông-jîn cheng； Tông-jîn cheng khì gō chhiáⁿ sí ， Hoan-hóe put-jû chiông-chiân seng 。	熟番歸化勤躬耕， 山田一甲唐人爭； 唐人爭去餓且死， 翻悔不如從前生。
	翻悔不如從前生，若是 in iah-koh 是「生番」， 是 m̄ 是 tō bōe 像chit-má an-nē 無 hō͘ 人承認做一族？
	日本時代，昭和三年(1928)出版一本《ロя③⑦語集》，記錄 in ê 語言。這是我 tī 新社 ê 時陣，看著一個文獻會 ê 王先生有 chit 本書，可惜後來我一直 chhē 無。戰後，國民黨政府真心適，將in 歸類 tī 阿美族內面，名義上， in 無 koh 再是 Kavalan ， mā 無 koh 再是加禮宛。Amis 無 ka in 當做是 Amis， kā 人講 in 是Kavalan 別人聽無， chit-個政府認定 in 是平地山胞…… chit 四、五十年來， in tiām-tiām 活落來， m̄ 知是 siáⁿ-mé 款 ê 心情？是感覺稀微， iah 是全然 ê 絕望 ？種作愛看天， lia̍h 魚愛看海，家己 ê 族名愛看國民黨，教育愛看漢人... ... iah koh 有 siáⁿ-mé 是家己會tàng 掌握 ê ？
	Tī 台灣，母語失落 ê 危機，因為強勢大眾媒體 ê 影響，變 kah特別嚴重，雖然 tī 錯誤 ê 政策下面，台灣各族群，除了北京人， lóng 愛承擔chit 個危機，總是人數少 ê 族群， chit 款問題 koh khah 大，尤其in iah koh m̄ 是 chit 個體制內所承認 ê 族群 ？
	後山 ê 存在， kám kan-na是為著 hō͘ 其他族群 ê 人， iah koh 有機會看著 Kavalan ê 祭典、儀式，聽著 in ê 語言？ 過了今仔日， siáⁿ-mé 是 iah koh 會tàng 保證 ê ？ Kavalan 人愛按怎做 ？ 咱一個旁觀者，愛按怎來配合 ？ 做一個台灣人， chit-kóa 問題咱攏無權利閃避，kám m̄是 ？
8. Í-āu, nā koh lâi Āu-soaⁿ ... 以後，若 koh 來後山...
	An-nē ，咱應該知影，後山，除了伊珍貴 ê 自然資源以外，人文資產其實 mā 不止仔豐富。了解 in ，了解你 kah in ê 互動，無的確會tàng ùi這中央 koh khah 了解你家己。
	所以，你會sái 先學一句 ： nng-í-sò ，oa-nái-ti hài-ià。另工，你若有機會 koh 來後山，除了欣賞光景以外，假使你有 tú 著Kavalan人，請你放開你 ê 心胸，用 tú chiah 學 ê chit 句話，大聲 kā 講：「你好無！」
	ps ： 假使你對 Kavalan 有趣味， 想 beh 愛 chhē 一 kóa 資料來讀， 會sái 來參考： 張振岳，《台灣後山風土誌》，台原 《宜蘭文獻》第六期 Kavalan 專刊。