翻頭想往事

楊允言

我第一遍對２２８有印象，是ti7成功嶺受訓e5 時，對連隊 書箱peng2著一本書，書內底攏是teh 講中國兵仔、公務人員按怎hou7 台灣e5 「暴民」 搶、thai5。彼陣ti7制式教育下，我並無反省思考e5能力，對台灣過去e5 歷史嘛全然 無知。

閣再看著２２８，是ti7大學二年beh 升三年e5 時，我無意 中ti7書店內底看著李筱峰教授所寫e5 「台灣戰後初期e5 民意代表」，書內底對 ２２８事件發生e5 原因、經過有真理性e5 描寫。算算咧，２２８事件發生e5 年代， 彼陣阮老父已經十外歲，是按怎伊m7-pat ka7我講起這層代誌？食暗飯e5 時， 我問阮老父，結果伊親像變做另外一個人仝款，講甲氣toah-toah。Hou7我驚一tio5 ， 我無法度理解，四十年前e5 往事，為啥麼會hou7 老父有按爾e5 反應。

身為台灣人，m7 知台灣歷史，家己感覺見笑，我開始 四界去走chhe7有關台灣歷史e5 冊。彼陣，書店內底排e5 ，大部分攏無啥寫著 這方面e5 資料，著愛靠黨外辦演講會，ti7 hia chhe7著一寡禁書。我漸漸對 台灣歷史有卡清楚e5 了解，政治態度也勻勻仔建立起來。我開始有一種感覺， 感覺身為一個台灣人，當我面對hou7 統治者扭曲e5 歷史及價值觀念e5 時， 我就有真憤慨。彼陣，我親像一個siau2宗教e5 傳教士，不時chhe7人討論， 有時戰甲頷頸筋細條猶閣興勃勃。我將四界收集來e5 禁書及黨外雜誌hou7朋友看。 彼時陣猶未解嚴，有時家己嘛會感覺驚驚。Pat ti7黨外演講會hou7 特務仔翕相， pat 投一篇２２８ e5 稿hou7 學校內e5 刊物，結果hou7 課外活動組chhe7 麻煩， pat hou7 教官叫去問話，也pat 因為按爾，失去一寡本成感情真好e5 朋友。

總是這攏過去啊。翻頭想起這段往事，對接觸２２８ 到讀台灣史，冥冥之中受先人e5 牽拾，一步一步向前行。有時陣teh 想，人e5 境遇 實在真微妙，假使當初我無經過彼寡刺激， 彼寡思考，無的確我這陣kan-taN 一心一意想beh做一個快樂e5 工程師，無煩惱，無苦痛，自然心內嘛無台灣。 感念承受台灣苦難e5 人，感念為台灣苦難歷史留落見證e5 人， 感念choe7-choe7 ti7思想、行動hou7 我啟示e5 人，假使無這寡人，我可能 猶閣ti7烏暗中teh 走chhe7出路。