九０年代以來校園台語文運動概況-3

學生台灣語文促進會

社會上的台語文工作者, 對學生攏有真大的幫贊,開課、講演,對學生有程度提升、意識啟蒙的作用。親像阿仁佇真儕學校的 台文社做指導老師……等等。因為學生這爿有腳手,有時仔嘛會凍共社會上的工作者鬥相共,可比 協辦營隊、參與國科會計劃……等等。

社會真看重學生的一舉一動,社會上的台文工作者嘛對舞台語文運動的學生 有真大的寄望,這會使講是學生的特權。

另外,佮社會上台語文工作者比較起來,學生所寫的物件,拼音系統、用字的 同質性真峘[koan5,高],這是佮抴頭[chhoa7-thau5]的人有相當大的關係。

但是社會上的台語文運動,加減有一寡派系的問題,嘛有互相鬥爭的情形,推廣 的力量無形中分散去;學生這爿無這個問題,有時仔佇面對社會上的台語文工作者的時,會感覺小可 [sio2-khoa2,稍微]為難。

學生先天不足後天失調, 先天方面,主要是本身的台語能力普遍卡差;後天方面,主要是校園內北京話是卡強勢的語言,台語使用 的機會並無儕。所以真歹佇校園內推廣台語文運動,佇校園內並無好做。

另外,現此時從事學運的學生普遍並無語言的覺醒,舞台語文運動的學生目前 參與學運的情形無算熱,台語的堅持有人,煞[soah,卻]無聲音。

閣卡重要的,改用台語文來表達家己的思考,其實是改變原來的生活方式,心態上 會凍支持是第一個階段,心態上支持、到實際來實行閣是另外一個階段,對大部分的人來講,這種改變 並毋是hiah呢[那麼]輕鬆。實際上,參加台語社的學生並毋是所有的人攏有做按呢的改變;既然如此, 欲推廣嘛會加減受著一寡阻礙。若是佮其它本土性社團比較起來,台語相關社團卡歹經營。

有互相聯絡的社團, 感情攏卡好,而且嘛卡有法度鬥陣做代誌。佮其它本土性社團比較起來,台語相關社團互相之間並無 路線的問題。

除了這以外,所寫的物件,同質性嘛卡峘[koan,高],可能是受著抵開始的元老的 影響,互相觀摩的關係。允言佇89年∼90年有翻譯一寡北京話的小說,雖然無正式出版,但是有一寡學校 用來做教材佇社團聚會的時陣讀;另外,TW301軟體的使用,攏加減會予互相的用字卡一致。

學生的活動空間主要 是佇學校,學術界有可能佮台語文運動有關係的部分,著是做台語研究的學者,益是[iah-si7,或是]支持 台語文運動的老師。

有一寡佇學校的老師,擔任台語社的指導老師、寄付錢銀予社團做經費,對學生 有真儕的鼓勵佮幫贊。但是,除了這以外,普遍來看,學生佮學界並無啥麼明顯的互動,那像田無交 水無流。

學術界佇91年成立台灣語文學會,因為定位是一個學術團體,入會資格要求 愛有語言學相關的基礎,按呢的設計,著已經無考慮著實際參與台語文運動的學生;學會主要欲做的, 包括制定台語音標、整理台語常用漢字、辦台語研討會,第二項益[iah,還]無消息,但是制定台語音標 方面,偏偏小組的成員閣無幾的人捌[bat,曾]實際做過台語文運動、寫過台語文,以按呢的背景,閣無 徵詢實際參與者的意見,煞[soah,卻]趕欲制定標準,予人感覺只是塊製造混亂,爭取領導權na-nia[而已] [註];閣卡害的是,雖然一寡縣市已經開始編寫、使用台語教材,這寡學者嘛無顧慮著chia[這些]的成果, kan-na[只]想欲向教育部推拺尹所制定的TLPA[註]……

台語研討會的部分,捌有一擺,因為交論文abstract(摘要)的傷[siuN,太]少,所以找 學生,希望會凍鬥寫文章,後來交去,尹彼爿[hit-peng5,那邊]的稿嘛已經有夠,著無共咱接受。研討會所 發表的論文,大部分對台語文運動無啥麼幫贊,主要只是欲建立尹的學術地位,最近閣因為語言使用的 問題,互相並毋是真爽快[註]。